Ubuyobozi bwa Teritwari ya Fizi, mu Nara ya Kivu y’Epfo muri Repubulika Iharanira Demokarasi ya Congo (DRC), bwatangaje ko hasenywe bariyeri zirenga 20 n’ahantu 15 hafungirwaga abantu mu buryo bunyuranyije n’amategeko ku muhanda uhuza Fizi na Masisi.
Umuyobozi wa Fizi, Samy Badibanga, yabitangaje ku wa Kane w’ejo hashize tariki ya 22 Ukwakira 2026, avuga ko icyo gikorwa kigamije guhagarika ihohoterwa n’ifatwa ry’abantu binyuranyije n’amategeko byashinjwaga bamwe mu barwanyi ba Wazalendo.
Nk’uko ubuyobozi bubivuga, icyo gikorwa cyakozwe nyuma yo kugisha inama Amuri Yakutumba, uzwi kandi nka Yamouri Yakutumba, umuhuzabikorwa wa Wazalendo.
Badibanga yatangaje kandi ko urubyiruko rusaga 200 rwiyandikishije ku bushake kugira ngo rwinjire mu ngabo za RDC, FARDC.
Yongeyeho ko abarwanyi ba Wazalendo bari i Masisi bitabiriye igikorwa cyo gushishikariza urubyiruko kwinjira mu gisirikare cya leta. Abo barwanyi ngo bahawe amabwiriza yo kujya ku birindiro by’imirwano biri mu misozi miremire ya Fizi, cyane cyane hafi ya Minembwe.
Uwo muyobozi yavuze ko muri ako gace ingabo za leta zihanganye n’imitwe yitwaje intwaro avuga ko ifitanye isano n’uwahoze ari Perezida wa DRC, Joseph Kabila.
Ibi bibaye mu gihe umutekano ukomeje kuba muke mu misozi miremire ya Fizi, ahabera imirwano hagati ya FARDC n’imitwe itandukanye yitwaje intwaro intwanya ubutegetsi bwa Kinshasa.
Ibitekerezo