Ikigo cy’Igihugu Gishinzwe Ubutaka (National Land Authority – NLA) cyasohoye amabwiriza avuguruye agenga imikoreshereze y’ubutaka mu Rwanda, agaragaza ibikorwa byemewe, ibisaba uruhushya rwihariye n’ibibujijwe gukorerwa mu bice bitandukanye by’igihugu birimo ko nta mva izongera kubakirwa.
Aya mabwiriza yasohotse mu kwezi kwa Nzeri 2026 mu nyandiko y’Icyongereza yiswe “Land User Master Plans, Zoning Regulations-Edition 2 (Amabwiriza agenga imikoreshereze y’ubutaka hakurikijwe ibishushanyo mbonera – Inyandiko ya kabiri ivuguruye), agamije kunoza ishyirwa mu bikorwa ry’ibishushanyo mbonera by’Umujyi wa Kigali n’uturere.
Aya mabwiriza akubiyemo ibijyanye n’imiturire, ubucuruzi, inganda, ubuhinzi, ubworozi, amashyamba, ibishanga, ibikorwa remezo n’ahagenewe serivisi rusange.
Mu mpinduka zigaragara harimo gushyiraho ibisabwa byihariye ku nyubako, ubuso bw’ibibanza, umubare w’amagorofa, ubucucike bw’amacumbi n’intera igomba gusigara hagati y’inyubako n’imbibi z’ibibanza.
Amabwiriza mashya yatangajwe agabanya ubutaka bw’imiturire mu byiciro bitandatu, ari byo R1, R1A, R1B, R2, R3 na R4, bitewe n’imiterere y’agace n’ubucucike bw’amacumbi.
Mu byiciro bya R1, R1A na R1B, bigaragaza ko byemewe kubaka inzu z’umuryango umwe, mu gihe muri R2, R3 na R4, izo nzu zibujijwe hagashyirwa imbere inyubako zakira imiryango myinshi.
Muri R1 na R1A, inyubako zishobora kugira amagorofa abiri hejuru y’igorofa ryo hasi, hiyongereyeho igice cyo hejuru kizwi nka “Rooftop”.
Muri R4, inyubako zigomba kugira nibura igorofa rimwe hejuru y’iryo hasi, ariko nta mubare ntarengwa w’amagorofa wagenwe, igihe hubahirijwe ibindi bipimo by’imyubakire.
NLA yateganyije kanis ko impushya zo kubaka inzu nini zihenze zo mu bwoko bwa villas na mansions cyangwa imidugudu yo guturamo zitazatangwa mbere y’uko hashyirwaho amabwiriza yihariye azigenga.
Izo nyubako ziteganyirizwa ibibanza bifite ubuso buri hagati ya metero kare 2,000 na 3,000, nibura 40% byabwo bikagenerwa ubusitani n’ibimera.
Zigomba kandi kuba zifite ibikorwaremezo bigezweho, uburyo bwo gucunga amazi n’imyanda, umutekano, ahaparikwa imodoka n’ibindi byangombwa byerekana urwego rwazo.
Inganda zigomba kuba kure y’amacumbi
Ku bijyanye n’inganda, amabwiriza ateganya ko inganda nto zishobora guteza urusaku cyangwa ihumana zigomba gusiga nibura metero 50 hagati yazo n’ahatuye abaturage.
Inganda rusange zisabwa kuba nibura muri metero 500 uvuye ku macumbi, mu gihe izishobora guteza ihumana rikomeye, zirimo izitunganya peteroli n’imiti, zigomba kuba nibura ku kirometero kimwe.
Ahatangirwa serivisi
Amabwiriza ateganya ko amashuri, amavuriro n’izindi serivisi z’ibanze bishyirwa hafi y’abaturage, aho bishoboka umuntu akabigeraho agenda n’amaguru mu ntera itarenze metero 400.
Ishuri ribanza rimwe riteganyirizwa abaturage bari hagati ya 15,000 na 20,000, naho ishuri ryisumbuye rigateganyirizwa abaturage bari hagati ya 20,000 na 25,000.
Ikigo nderabuzima na cyo giteganyirizwa abaturage bari hagati ya 15.000 na 20.000.
Amabwiriza agenga amarimbi
Ku bijyanye n’amarimbi, NLA ibuza gushyiramo beto n’amakaro, haba munsi cyangwa hejuru y’ubutaka.
Irimbi ryegereye igishanga rigomba gusiga intera iri hagati ya metero 200 na 300, hakabanza gukorwa isuzuma ry’ingaruka ku bidukikije.
Muri rusange, aya mabwiriza agamije guteza imbere imiturire iteguwe neza, kurengera ibidukikije no gukoresha ubutaka mu buryo burambye, hitawe ku iterambere ry’imijyi n’icyaro ndetse n’imibereho myiza y’abaturage.
Ibitekerezo