Amashuri yisumbuye ari hagati ya 400 na 500 mu Bufaransa arateganya gufunga yose cyangwa bimwe mu bice byayo kuri uyu wa Mbere tariki ya 5 Ukwakira 2026, kubera imyigaragambyo y’abanyeshuri imaze iminsi irangwa no guhangana n’abapolisi.
Ejo hashize ku Cyumweru, Minisitiri w’Uburezi, Édouard Geffray yatangaje ko amasomo azahagarikwa muri ayo mashuri kubera umutekano muke. Yavuze ko kuva iyi myigaragambyo yatangira, amashuri 24 yatwitswe cyangwa agasahurwa.
Abanyeshuri ibihumbi n’abandi babashyigikiye basaba leta kongera umubare w’abarimu, kugabanya ubucucike bw’abanyeshuri mu mashuri no gusana inyubako z’amashuri zishaje.
Iyi myigaragambyo yatangiriye i Paris mu cyumweru gishize, igera no mu yindi mijyi irimo Montpellier, Nantes na Marseille.
Minisitiri w’Ubutabera, Gérald Darmanin, yavuze ko kugeza ku wa Gatanu, imyigaragambyo yari imaze guhungabanya imikorere y’amashuri 735 muri 3.700 yo mu Bufaransa.
Ibitekerezo