Indege ya Flydubai yavaga i Dubai yerekeza i Tel Aviv muri Israel yakoze impanuka yihutira kugwa i Tabuk muri Arabia Sawudite, nyuma y’imirwano yabereye mu cyumba cy’abapilote.
Minisitiri w’Intebe wa Israel, Benjamin Netanyahu, yavuze ko umwe mu bapilote yakomerekeje mugenzi we akoresheje icyuma, bikekwa ko yashakaga gutuma indege ihanuka. Icyakora, Flydubai yavuze ko icyateye uko gushyamirana n’impamvu zabyo bitaramenyekana, kandi ko iperereza rikomeje.
Indege FZ1073 yari imaze amasaha agera kuri abiri n’igice ihagurutse i Dubai ubwo yatangiraga kumanuka vuba. Amakuru y’indege agaragaza ko yavuye ku butumburuke bwa metero hafi 10,000 ikagera kuri metero hafi 5,200 mu gihe gito. Abagenzi n’abakozi bageze mu cyumba cy’abapilote, bafasha gufata uwakekwagaho igitero, maze abandi bakozi b’indege bayisubiza ku murongo. Yamanutse i Tabuk nta mpanuka ibaye.
Kapiteni wakomerekejwe yitwa Smit Machchhar, akaba akomoka mu Buhinde. Netanyahu yamushimye avuga ko yagaragaje ubutwari, kuko nubwo yari yakomeretse yashoboye kurwanya mugenzi we no gufungura urugi rw’icyumba cy’abapilote, bituma abagenzi n’abakozi bagira uko batabara. Abapilote bombi bajyanywe kwitabwaho n’abaganga i Tabuk.
Netanyahu yavuze ko umupilote ukekwaho iki gikorwa yafashwe n’inzego z’Arabia Sawudite kandi ari kubazwa. Gusa, kugeza ubu impamvu yaba yaratumye akora ibyo ashinjwa ntiramenyekana. Abategetsi ba Israel batangaje ko bazongera gusuzuma ingamba z’umutekano zireba indege zijya muri icyo gihugu, mu gihe Flydubai yavuze ko iperereza ryemewe rikomeje.
Nyuma y’aho, Flydubai yohereje indi ndege itwara abagenzi i Tel Aviv. Iyi mpanuka yatumye Arabia Sawudite na Israel bikorana mu gufasha abagenzi, nubwo ibyo bihugu bidafitanye umubano usanzwe wa dipolomasi. Abagenzi bageze ku Kibuga cy’Indege cya Ben Gurion, aho imiryango yabo yari yabategereje.
Ibitekerezo