Idrissa Jean Luc Ouédraogo yajyanye umugore we, Ishimwe Vestine, mu Rukiko rw’Ibanze rwa Kicukiro, arusaba gutegeka ko yemererwa kubona umwana bivugwa ko babyaranye ndetse bagakorerwa ibizamini bya DNA kugira ngo hamenyekane niba koko ari umwana we.
Inkuru dukesha ikinyamakuru IGIHE ivuga ko iki kirego cyatanzwe kuri uyu wa Kane tariki ya 17 Nzeri 2026, mu gihe Ouédraogo ategereje kuburana mu mizi urubanza rw’ubutane yarezwemo na Vestine.
Mu nyandiko yagejeje ku rukiko, Ouédraogo yavuze ko kuva uwo mwana yavuka atigeze amubona, nubwo ngo yakomeje gusaba Vestine ko bahura. Yagaragaje impungenge z’uko aramutse atandukanye burundu na nyina w’umwana, kubona uwo mwana byarushaho kugorana, cyane ko Vestine asanzwe aba mu mahanga (Canada).
Yasabye urukiko ko mbere y’uko urubanza rw’ubutane rutangira kuburanishwa mu mizi, rwategeka Vestine kumwereka umwana. Si ibyo gusa kandi kuko yanasabye ko bombi bapimwa DNA, akavuga ko ibisubizo byamufasha gukuraho gushidikanya no kumenya niba agomba gukomeza kuzuza inshingano ze nk’umubyeyi.
Iki kirego gikurikira icyo Vestine aherutse gutanga asaba gatanya. Yavuze ko yafashe uwo mwanzuro nyuma yo kubona amakuru n’ibimenyetso by’uko umugabo we yaba yararyamanye n’abandi bagore ndetse bamwe akabatera inda. Ouédraogo, we, yahakanye ibyo birego.
Vestine na Ouédraogo ukomoka muri Burkina Faso bakoze ubukwe ku wa 5 Nyakanga 2025, nyuma y’igihe bakundana, nk’uko byatangajwe. Vestine asanzwe azwi mu muziki wo kuramya no guhimbaza Imana, aho aririmbana na murumuna we Dorcas mu itsinda rya Vestine & Dorcas.
Amakuru y’amasoko atandukanye avuga ko Vestine ashobora kuba yarabyaranye n’undi mugabo utari Idrissa ari na yo mpamvu yanze kumwereka umwana yabyaye kandi barashyingiwe byemewe n’amategeko.
Kugeza ubu, urukiko ntiruratangaza umwanzuro ku busabe bwa Ouédraogo. Ibyo buri ruhande ruvuga biracyari ibirego n’ubusabe bizasuzumwa n’urukiko; ntibirafatwa nk’ukuri kwamaze kwemezwa n’ubutabera.
Ibitekerezo