Minisitiri w’Intebe w’u Butaliyani, Giorgia Meloni, agiye kuyobora inama yihutirwa y’umutekano kuri uyu wa Mbere tariki ya 19 Ukwakira 2026, nyuma y’imvururu zahuje abigaragambyaga n’abapolisi mu Mujyi wa Milan.
Izo mvururu zatangiye ku mugoroba wo ku wa Gatandatu w’icyumweru gishize zikomeza kugeza ku Cyumweru. Zakurikiye imyigaragambyo yitabiriwe n’abantu barenga ibihumbi bitanu (5,000), biganjemo abanyeshuri, bamagana izamuka ry’ibiciro rituma imibereho irushaho guhenda.
Bamwe mu bigaragambyaga bateye abapolisi amabuye, intebe n’ibikoresho bishyirwamo imyanda. Polisi yabasubije ikoresheje imodoka zitera amazi n’ibyuka biryana mu maso kugira ngo ibatatanye.
Meloni yamaganye urwo rugomo, avuga ko abantu yise “abagizi ba nabi” bitwaje imyigaragambyo maze bateza akavuyo.
Mu gihe mu Butaliyani hari hakomeje gukurikirwa iby’izo mvururu, ku Cyumweru no mu murwa mukuru w’Albania, Tirana, habereye imyigaragambyo ikomeye yo kwamagana ubutegetsi.
Abantu benshi bitabiriye iyo myigaragambyo basabye Minisitiri w’Intebe, Edi Rama, kwegura, bavuga ko batanyuzwe n’imiyoborere ye. Banagaragaje ko bahangayikishijwe n’ibibazo by’ubukungu n’imibereho byugarije abaturage, basaba impinduka mu buyobozi bw’igihugu.
Ibitekerezo