Zinédine Zidane, umwe mu bakinnyi bakomeye Ubufaransa bwagize mu mateka, yagizwe umutoza mukuru w’ikipe y’igihugu, Les Bleus. Asimbuye Didier Deschamps wari umaze imyaka 14 kuri uwo mwanya, agiye afite inshingano zo kubaka ikipe izahangana mu gushaka itike ya Euro 2028 no mu rugendo rugana mu Gikombe cy’Isi cya 2030.
Ishyirahamwe ry’Umupira w’Amaguru mu Bufaransa, Fédération Française de Football (FFF), ryemeje ku wa Kabiri tariki ya 28 Nyakanga 2026 ko Zinédine Zidane ari we mutoza mushya w’ikipe y’igihugu y’Ubufaransa.
Zidane w’imyaka 54 asimbuye Didier Deschamps, wari umaze imyaka 14 atoza Les Bleus. Deschamps yasezeye nyuma y’uko Ubufaransa busoreje ku mwanya wa kane mu Gikombe cy’Isi cya 2026, aho bwari bwatsinzwe na Espagne ibitego 2-0 muri ½ cy’irangiza, mbere yo kongera gutsindwa n’Ubwongereza mu mukino wo guhatanira umwanya wa gatatu.
Amasezerano ya Zidane azageza ku Gikombe cy’Isi cya 2030. Azatangira imirimo ku mugaragaro tariki ya 1 Kanama 2026, ayobore Ubufaransa muri UEFA Nations League ya 2026–2027, mu gushaka itike ya Euro 2028, muri Nations League ya 2028–2029 no mu mikino yo gushaka itike y’Igikombe cy’Isi cya 2030. Abaye umutoza wa 18 uyoboye Les Bleus kuva mu 1964 nk’uko FFF ibitangaza.
Ishyirwaho rye ryari rimaze igihe ritegerejwe n’abakunzi ba ruhago, cyane cyane ab’Abafaransa babona Zidane nk’umuntu ufite amateka, ubushobozi n’igitinyiro bikenewe kugira ngo akomeze kubaka ikipe iri mu zikomeye ku Isi.
“Ni ishema rikomeye”
Mu ijambo rye rya mbere nyuma yo guhabwa izi nshingano, Zidane yavuze ko gutoza ikipe y’igihugu ari ibyishimo, ishema n’inshingano zikomeye.
Yagize ati: “Nakunze kubivuga: nta kintu gikomeye kurusha ikipe y’igihugu y’Ubufaransa. Ni ibyishimo kandi ni ishema rikomeye kuba ngizwe umutoza w’iyi kipe. Ni n’inshingano zikomeye.”
Zidane yashimiye Perezida wa FFF, Philippe Diallo, abagize komite nyobozi y’iryo shyirahamwe ndetse n’abandi bamugiriye icyizere. Yashimiye kandi Didier Deschamps n’abari bagize itsinda ry’abatoza bamwungirije ku bw’imyaka 14 bamaze bakorera ikipe y’igihugu.
Yongeyeho ati: “Uyu munsi ndazirikana by’umwihariko abatoza bose banyigishije. Nta mpamvu yo kubihisha, mfitiye ikipe y’igihugu y’u Bufaransa intego zikomeye.”
Aya magambo agaragaza ko Zidane azi neza uburemere bw’inshingano yahawe. Ubufaransa bufite abakinnyi benshi bafite impano kandi bakina mu makipe akomeye ku mugabane w’Uburayi. Icyakora, kugira abakinnyi beza gusa ntibihagije; umutoza mushya azasabwa kubahuza, kububakamo icyizere no gushyiraho uburyo bw’imikinire bushobora kubyara ibikombe.
FFF yise Zidane “umunyabigwi”
Perezida w’Ishyirahamwe ry’Umupira w’Amaguru mu Bufaransa, Philippe Diallo, yavuze ko guha Zidane ikipe y’igihugu ari ishema rikomeye kuri FFF no ku mupira w’amaguru w’Ubufaransa muri rusange.
Yagize ati: “Kugira Zinédine Zidane umutoza w’ikipe y’igihugu y’Ubufaransa ni ishema rikomeye ku Ishyirahamwe ry’Umupira w’Amaguru mu Bufaransa.”
Diallo yavuze ko ari uguhura k’umunyabigwi mu mateka ya Les Bleus n’ikipe ifite ubushobozi budasanzwe kandi ishyize imbere intego zo kugera ku rwego rwo hejuru.
Zidane ntabwo agarutse mu ikipe y’igihugu nk’umuntu utazwi. Yigeze kuyikinira, anayibera kapiteni kandi ayifasha kwegukana ibikombe bikomeye. Ubu agarutse afite ubunararibonye nk’umutoza wegukanye bimwe mu bikombe bikomeye ku rwego rw’amakipe.
Abasesenguzi babona ko ubumenyi afite ku mupira w’amaguru w’Ubufaransa, ubunararibonye ku rwego mpuzamahanga ndetse n’uburyo yubashywe n’abakinnyi bishobora kumufasha muri izi nshingano.
Deschamps asoje imyaka 14 y’amateka
Didier Deschamps yari amaze igihe kirekire kurusha abandi bose atoza ikipe y’igihugu y’Ubufaransa. Yahawe izi nshingano mu 2012, asimbuye Laurent Blanc, akomeza guhindura Les Bleus imwe mu makipe yahoraga ahabwa amahirwe yo kugera kure mu marushanwa akomeye.
Mu myaka 14 yamaze ku buyobozi bw’Ubufaransa, Deschamps yabugejeje ku mikino ya nyuma y’amarushanwa akomeye inshuro eshatu.
Mu 2016, Ubufaransa bwageze ku mukino wa nyuma wa Euro bwari bwakiriye, ariko butsindwa na Portugal igitego 1-0 mu minota y’inyongera.
Mu 2018, Deschamps yafashije Ubufaransa kwegukana Igikombe cy’Isi cyabereye mu Burusiya, butsinda Croatia ibitego 4-2 ku mukino wa nyuma. Icyo gikombe cyatumye aba umwe mu bantu bake batwaye Igikombe cy’Isi nk’abakinnyi bakongera kugikura nk’abatoza.
Deschamps yari kapiteni w’Ubufaransa ubwo bwegukanaga Igikombe cy’Isi cya 1998. Nyuma y’imyaka 20, yabuyoboye nk’umutoza ubwo bwacyegukanaga ku nshuro ya kabiri.
Mu 2021, Ubufaransa bwe bwegukanye UEFA Nations League, butsinda Espagne ibitego 2-1 ku mukino wa nyuma. Mu Gikombe cy’Isi cya 2022 cyabereye muri Qatar, Les Bleus yongeye kugera ku mukino wa nyuma, ariko itsindwa n’Argentine kuri penaliti nyuma y’uko iminota 120 irangiye amakipe yombi anganya ibitego 3-3.
Deschamps yatangaje kuva muri Mutarama 2025 ko yari kuzasezera ku ikipe y’igihugu nyuma y’Igikombe cy’Isi cya 2026. Yasoje urugendo rwe nyuma yo kuyobora imikino 185, asiga umurage wo guhora ageza ikipe mu byiciro bya nyuma by’amarushanwa akomeye.
Zidane azatoza umukino we wa mbere w’amarushanwa tariki ya 25 Nzeri 2026, ubwo Ubufaransa buzasura Türkiye mu mukino wa UEFA Nations League.
Uyu mukino uzabera kuri Kocaeli Stadium mu Mujyi wa İzmit. Ubufaransa buzaba buri mu itsinda ririmo Türkiye, Ububiligi n’Ubutaliyani.
Nyuma yo guhura na Türkiye, Les Bleus izasura Ububiligi tariki ya 28 Nzeri, mbere yo kwakira Ubutaliyani kuri Stade de France tariki ya 2 Ukwakira 2026.
Iyi mikino izaha abakunzi b’Ubufaransa amahirwe ya mbere yo kureba impinduka Zidane azaba yazanye. Biteganyijwe ko azashyira imbere umukino usatira, kubaka imipira uturutse inyuma no guha abakinnyi bafite impano umudendezo wo kugaragaza ubushobozi bwa bo.
Azaba afite amahitamo menshi mu bakinnyi beza barimo kapiteni Kylian Mbappé, Ousmane Dembélé, Aurélien Tchouaméni, Eduardo Camavinga, William Saliba, Michael Olise, Bradley Barcola na Warren Zaïre-Emery.
Ikibazo gikomeye kizaba ukuntu azakoresha ubwo bushobozi bwose kugira ngo yubake ikipe ihamye, ifite uburinganire hagati yo gusatira no kwirinda.
Yanditse amateka muri Real Madrid
Zidane yari amaze imyaka irenga itanu adatoza, kuva asezeye muri Real Madrid mu 2021. Nubwo muri icyo gihe yagiye avugwa mu makipe atandukanye, yakomeje kugaragaza ko gutoza Ubufaransa ari imwe mu ntego ze zikomeye.
Nyuma yo guhagarika gukina umupira mu 2006, Zidane yabanje kumara igihe atari mu butoza. Mu 2014, yagizwe umutoza wa Real Madrid Castilla, ikipe ya kabiri ya Real Madrid.
Muri Mutarama 2016, yarazamuwe ahabwa ikipe nkuru, asimbuye Rafael Benítez. Mu mezi make, yafashije Real Madrid kwegukana UEFA Champions League, itsinda Atlético Madrid kuri penaliti ku mukino wa nyuma wabereye i Milan.
Icyo cyari intangiriro y’imyaka itatu idasanzwe. Real Madrid yegukanye Champions League inshuro eshatu zikurikirana, mu 2016, 2017 na 2018. Yabaye ikipe ya mbere ibigezeho kuva irushanwa ryatangira kwitwa Champions League.
Zidane kandi yegukanye shampiyona ya Espagne, La Liga, mu mwaka w’imikino wa 2016–2017. Yasezeye mu 2018, avuga ko ikipe yari ikeneye impinduka kugira ngo ikomeze gutsinda.
Yagarutse muri Werurwe 2019, Real Madrid iri mu bihe bigoye. Mu mwaka w’imikino wa 2019–2020, yongeye kuyifasha kwegukana La Liga. Yasezeye ku nshuro ya kabiri mu 2021, nyuma y’umwaka ikipe itabonye igikombe.
Muri rusange, Zidane yatwaye ibikombe 11 nk’umutoza wa Real Madrid. Birimo Champions League eshatu, La Liga ebyiri, FIFA Club World Cup ebyiri, UEFA Super Cup ebyiri na Super Cup ya Espagne ebyiri.
Umunyabigwi nk’umukinnyi
Mbere yo kuba umutoza wubashywe, Zidane yari yaranditse amateka nk’umwe mu bakinnyi b’abahanga kurusha abandi bo mu gihe cye.
Yatangiye gukina nk’uwabigize umwuga muri Cannes mu 1989. Nyuma yakiniye Bordeaux, mbere yo kwerekeza muri Juventus mu 1996.
Muri Juventus, yafashije iyo kipe kwegukana Serie A inshuro ebyiri zikurikirana no kugera ku mukino wa nyuma wa Champions League inshuro ebyiri.
Mu 2001, Real Madrid yamuguze miliyoni 77.5 z’amayero, icyo gihe yari amafaranga menshi kurusha ayari yarigeze kugurwa umukinnyi uwo ari we wese. Yabaye umwe mu bakinnyi b’umushinga wa “Galácticos”, wari urimo ibyamamare nka Luís Figo, Ronaldo Nazário, Roberto Carlos na David Beckham.
Kimwe mu bihe bitazibagirana mu mateka ye muri Real Madrid ni igitego yatsinze Bayer Leverkusen ku mukino wa nyuma wa Champions League mu 2002. Yateye umupira utaragera hasi n’akaguru k’ibumoso, afasha Real Madrid gutsinda ibitego 2-1.
Mu ikipe y’igihugu, Zidane yakinnye imikino 108 atsinda ibitego 31. Mu 1998, yatsinze ibitego bibiri n’umutwe ku mukino wa nyuma w’Igikombe cy’Isi, Ubufaransa butsinda Brazil ibitego 3-0.
Ni bwo bwa mbere Ubufaransa bwari bwegukanye Igikombe cy’Isi. Uwo mwaka, Zidane yahawe Ballon d’Or nk’umukinnyi witwaye neza kurusha abandi ku Isi.
Yanagize uruhare rukomeye mu ikipe y’Ubufaransa yegukanye Euro 2000. Nubwo yari yasezeye mu ikipe y’igihugu mu 2004, yaje kwemera kugaruka kugira ngo afashe igihugu cye kubona itike y’Igikombe cy’Isi cya 2006.
Muri iryo rushanwa, yafashije Ubufaransa kugera ku mukino wa nyuma, bukuramo Espagne, Brazil na Portugal. Ku mukino wa nyuma na Italy, Zidane yafunguye amazamu kuri penaliti yateye mu buryo bwa “Panenka”.
Icyakora, uwo mukino wabaye uwa nyuma mu mwuga we wasojwe n’ishusho itazibagirana, ubwo yakubitaga Marco Materazzi umutwe mu gituza agahabwa ikarita itukura. Italy yaje kwegukana igikombe kuri penaliti.
Inzozi amaze imyaka myinshi ategereje
Zidane yari amaze igihe kirekire avugwa nk’uwagombaga kuzatoza ikipe y’igihugu y’Ubufaransa. Izina rye ryatangiye kuvugwa cyane nyuma y’uko Les Bleus iviriyemo mu matsinda y’Igikombe cy’Isi cya 2010.
Icyakora, icyo gihe yari ataratangira umwuga w’ubutoza. Nyuma yo kwitwara neza muri Real Madrid, byarushijeho kugaragara ko umunsi umwe ashobora guhabwa ikipe y’igihugu.
Ubu agiye kuyobora ikipe yigeze guhesha ibikombe nk’umukinnyi. Abaye uwa gatatu mu bakinnyi begukanye Igikombe cy’Isi cya 1998 bahawe gutoza Les Bleus, nyuma ya Laurent Blanc na Didier Deschamps.
Guhabwa iyi kipe bizana amahirwe ariko bikajyana n’igitutu gikomeye. Abakunzi b’Ubufaransa ntibazishimira gusa kubona ikipe ikina neza; bazaba bategereje ibikombe.
Intego ya mbere ya Zidane ni ukubaka ikipe ishobora kwegukana Euro 2028. Nyuma ya yo, azaba ahanzwe amaso mu mikino yo gushaka itike y’Igikombe cy’Isi cya 2030, irushanwa rizabera muri Maroc, Espagne na Portugal, mu gihe imikino itatu yihariye izakinirwa muri Uruguay, Argentine na Paraguay.
Zidane afite amateka yo gutsinda, azi uburyo bwo kuyobora abakinnyi b’ibyamamare kandi yumva neza igitutu kijyana no guhagararira Ubufaransa. Igisigaye ni ukwerekana niba ubuhanga bwamufashije kwandika amateka muri Real Madrid buzamufasha kubaka ikindi gihe cy’ubutsinzi muri Les Bleus.
Ibitekerezo