Minisitiri w’Ububanyi n’Amahanga wa Iran, Abbas Araqchi, yatangaje ko intumwa nkuru z’igihugu cye zagiye i New York muri Leta Zunze Ubumwe z’Amerika zigamije gushaka inzira y’amahoro, ariko ashimangira ko Tehran yiteguye kwirwanaho mu gihe yagabwaho ibindi bitero.
Araqchi yagiye i New York ari kumwe na Perezida wa Iran, Masoud Pezeshkian, mu nama ya 81 y’Inteko Rusange y’Umuryango w’Abibumbye. Mu kiganiro yahaye televiziyo NBC News ku Cyumweru cy’ejo hashize, yavuze ko nubwo Iran ikomeje guharanira ko amakimbirane akemurwa binyuze muri dipolomasi, itazadohoka mu gihe umutekano wayo waba ubangamiwe.
Yagize ati: “Twaje i New York gushaka inzira y’amahoro. Ariko tuzakomeza gushikama imbere y’igitero icyo ari cyo cyose, kabone nubwo cyatugeza ku ntambara ikomeye cyane. Nubwo bimeze bityo, ndacyagerageza inzira ya dipolomasi kuko nta mahirwe y’amahoro dukwiye gupfusha ubusa.”
Aya magambo aje nyuma y’amakuru avuga ko Perezida w’Amerika, Donald Trump, yanze umugambi Iran yari yatanze ugamije guhagarika imirwano no kongera gufungura Inzira yo mu Muhora wa Hormuz. Icyakora, Trump yavuze ko ibiganiro bitaziguye hagati y’impande zombi, binyuze ku bahuza, biteganyijwe gukomeza mu minsi iri imbere.
Umugambi wa Iran uteganya ko Inzira ya Hormuz yakongera gufungurwa mu gihe cy’iminsi irindwi Amerika imaze kuwemera. Tehran irasaba ko Amerika ihagarika ibitero, igakuraho ibihano bibangamira igurishwa rya peteroli ya Iran, ikarekura umutungo wayo wafunzwe kandi igakuraho ingabo zayo zafunze ibyambu bya Iran. Ku munsi wa karindwi, impande zombi zahita zisubukura ibiganiro birimo n’ibyerekeye gahunda ya Iran y’ingufu za nucléaire.
Inzira ya Hormuz, iri hagati ya Iran na Oman, ni imwe mu nzira zikomeye ku isi zinyuzwamo peteroli na gaz. Gufungwa cyangwa guhungabana kwayo byagize ingaruka ku bucuruzi mpuzamahanga no ku biciro by’ingufu. Nubwo ibiganiro byahujwe na Qatar i New York byiswe ibyubaka, kugeza ubu nta masezerano afatika aragerwaho.
Ibitekerezo