Ubuyobozi bukuru bw’ingabo za Iran buzwi nka Khatam al-Anbiya Central Headquarters bwatangaje ko ibikorwa bya gisirikare byari birimo gukorwa bihagaritswe.
Mu itangazo rya bwo, bwagize buti: “Turatangaza ku mugaragaro ko ibikorwa by’ingabo bihagaritswe.”
Icyakora, Iran yanatanze umuburo ko nibaramuka bongeye kugabwaho ibitero, harimo n’ibikorerwa mu majyepfo ya Lebanon, izabisubiza mu buryo bukomeye kandi burenze ubwari bwakoreshejwe mbere.
Iran yatangiye ibikorwa bya gisirikare ejo hashize nyuma y’uko Israel igabye ibitero mu majyepfo y’umurwa mukuru wa Lebanon, Beirut. Mu gusubiza, Israel na yo yagabye ibitero kuri Iran.
Ku mugoroba wo ku wa Mbere, abayobozi bakuru ba politiki n’aba gisirikare muri Iran bari baburiye ko igihugu cya bo cyiteguye gusubiza mu buryo bwa gisirikare icyo bise kurenga ku masezerano yo guhagarika imirwano.
Iran ivuga ko amasezerano yo guhagarika imirwano muri Lebanon afatwa nk’igice cy’amasezerano yagiranye na Israel yo guhagarika imirwano hagati y’impande zombi.
Ibitekerezo