Umukecuru w’imyaka 87 wirukanwe mu nzu yari amaze imyaka irenga 70 ayibamo akodesha bigateza imyigaragambyo muri Esipanye, yapfuye ku wa Gatatu w’ejo hashize, nk’uko byatangajwe n’ishyirahamwe ry’abapangayi rikorera mu Mujyi wa Madrid.
Maricarmen Abascal yirukanywe mu nzu ye ku ya 23 Nzeri 2026, aryamye ku gitambaro, nyuma y’uko atashoboraga kwishyura ubukode bwari bwiyongereye.
Se yari yaratangiye gukodesha iyo nzu mu 1956. Nyuma ishyirahamwe Urbagest ryayiguze mu 2018 ryongera amafaranga y’ubukode ava kuri 500 € (arenga ibihumbi 800Frw) ku kwezi agera kuri 2,650 € (hafi miliyoni 4.5Frw).
Nyuma, sosiyete yemeye kuyagabanya kugeza kuri 1,650 € (arenga gato miliyoni 2.7Frw) no kumuha uburenganzira bwo gusubira mu nzu. Ariko, Abascal ntiyashoboye gusinya amasezerano mashya kuko yari mu bitaro.
Icyateye urupfu rw’uyu mukecuru ntikiratangazwa.
Urupfu rwe rwamenyekanye ubwo abigaragambyaga ibihumbi n’ibihumbi bari bamaze iminsi bigaragambya mu kibuga cya Puerta del Sol i Madrid, basaba ko ikiguzi cyo gukodesha inzu cyagabanywa.
Abigaragambya bacanye buji, bafata umunota umwe wo kumwibuka, maze bagenda berekeza mu nyubako y’Inteko Ishinga Amategeko bavuga ko batazihanganira ko abandi bantu birukanwa mu nzu.
Ibi byatumye habaho impaka zikomeye za politiki. Minisitiri w’Intebe Pedro Sánchez yatangaje amatora yo ku ya 29 Ugushyingo, mbere y’uko byari biteganijwe, nyuma y’uko inteko ishinga amategeko yanze itegeko rigamije gukemura ikibazo cy’imiturire.
Ibitekerezo