Ubuyobozi bw’Akarere ka Ngororero buvuga ko buri gushakisha, bufatanyije na Polisi n’Urwego rw’Igihugu rw’Ubugenzacyaha (RIB), umukozi wo mu buvuzi bw’amenyo ukekwaho gusambanya ku gahato umukobwa w’imyaka 18 wari wagiye kwivuriza ku Kigo Nderabuzima cya Nyange.
Amakuru dukesha Ukweli Times avuga ko uwo mukozi usanzwe akorera ku Bitaro bya Muhororo yari yagiye gutanga serivisi z’ubuvuzi bw’amenyo i Nyange ku wa 12 Nzeri 2026. Uwo mukobwa yari yaje kwikuza iryinyo. Nyuma yo kuva mu cyumba yavurirwagamo, yabwiye abandi barwayi ko yahohotewe. Uwo mukozi yahise abura, nk’uko ubuyobozi bw’akarere bubivuga.
Umuyobozi w’Akarere ka Ngororero, Nkusi Christophe, yavuze ko inzego z’umutekano zikomeje kumushakisha. Ku bivugwa ko yaba yarafashijwe gutoroka n’umuyobozi w’ikigo nderabuzima, Nkusi yavuze ko nta makuru abifiteho.
Ati: “Uwo mukobwa akimara kuvuga ko yafashwe ku ngufu, muganga yahise abura n’ubu ntaraboneka, turacyamushakisha dufatanyije n’inzego z’umutekano”.
Uwo mukobwa yoherejwe mu kigo cya Isange One Stop Centre ya Kabgayi kugira ngo ahabwe ubufasha kandi afashwe mu gutanga ikirego. Isange One Stop Centre zitanga ubuvuzi, ubujyanama n’ubufasha mu by’amategeko ku bahuye n’ihohoterwa.
Uyu mukozi namara gufatwa azashyikirizwa inzego z’ubugenzacyaha mbere y’uko dosiye y’ibyaha azaba akurikiranyweho itunganywa neza ikazashyikirizwa ubugenzacyaha.
Ibitekerezo