Umuvugizi wa Minisiteri y’Ububanyi n’Amahanga ya Qatar, Majed al-Ansari, yavuze ko igihugu cye kizakomeza gushyigikira ibiganiro bya dipolomasi bigamije kurangiza amakimbirane hirya no hino ku isi, kuva mu Karere k’Ibiyaga Bigari muri Afurika kugera mu karere k’Ikigobe cy’Abarabu.
Mu kiganiro yagiranye na Al Jazeera, al-Ansari yashimye isubukurwa ry’umubano w’u Bubiligi n’u Rwanda. Hari hashize amezi 18 ibihugu byombi byirukanye abadipolomate ba mugenzi wabyo, nyuma yo kutumvikana ku makimbirane yo mu burasirazuba bwa Repubulika Iharanira Demokarasi ya Congo (RDC).
Mu itangazo byasohoye bihuriyeho, ibihugu byombi byashimiye Qatar kuba yarafashije gutegura ibiganiro byabyo bya mbere muri Kamena 2025. Al-Ansari yavuze ko ibyo biganiro byafunguye inzira yo kurushaho kwegerana mu rwego rwa dipolomasi.
Yavuze ko Qatar imaze igihe igira uruhare mu gushaka umuti w’ibibazo byo mu Karere k’Ibiyaga Bigari. Muri urwo ruhare harimo guhuza RDC, u Rwanda n’umutwe witwaje intwaro wa M23, ndetse no kwakira ibiganiro byabereye i Doha muri Kamena 2025.
Yagize ati: “Icyo cyari ikiganiro cyatanze intambwe ikomeye hagati y’abaminisitiri babiri b’ububanyi n’amahanga bari bamaze igihe badahura. Baganiriye ku bibazo byinshi byari bimaze igihe biri hagati y’impande zombi.”
Al-Ansari yavuze ko u Bubiligi n’u Rwanda byagiriye Qatar icyizere kubera uko yari isanzwe ikorana na buri gihugu.
Yagize ati: “Uko ni ko dusanzwe dukora. Dutanga aho impande zihurira, tukazereka ko zishobora kutugirira icyizere, tukazihuza, hanyuma tukizera ko ibiganiro bizakomeza gutera imbere.”
‘Nta yindi nzira isimbura dipolomasi’
Umuyobozi wa Qatar, Sheikh Tamim bin Hamad Al Thani, yabwiye Inteko Rusange y’Umuryango w’Abibumbye i New York ko igihugu cye, nk’umuhuza, cyahoraga gishaka gukemura amakimbirane binyuze mu biganiro no mu mishyikirano, kugira ngo haboneke “ibisubizo biboneye kandi birangwa n’ubutabera, bishingiye ku mategeko mpuzamahanga”.
Minisitiri w’Ububanyi n’Amahanga wa Qatar na we yahuye na mugenzi we wa Iran. Baganiriye ku bikorwa byo kugabanya umwuka mubi mu karere k’Ikigobe cy’Abarabu no gushyiraho uburyo bwatuma ibiganiro bishoboka.
Al-Ansari yabwiye Al Jazeera ko mu minsi ishize habaye intambwe mu mishyikirano igamije guhagarika intambara Amerika na Israel birwana na Iran, nubwo ibiganiro byabanje byagiye bihura n’imbogamizi nyinshi.
Yagize ati: “Twemera ko nta yindi nzira isimbura dipolomasi, kandi ntidushobora kwemera ko ibiganiro bya dipolomasi binanirwa.”
Yongeyeho ati: “Ubu icyo dushyize imbere ni ugukomeza inzira zo kuvugana, ibiganiro bigakomeza kandi buri ruhande rugategwa amatwi.”
Abayobozi ba Qatar bahuye na Perezida w’Amerika, Donald Trump, ku wa Kabiri, mu gihe cy’Inteko Rusange y’Umuryango w’Abibumbye.
Al-Ansari yavuze ko babwiye Trump ko ingaruka z’intambara yo muri Iran n’iz’amakimbirane yo muri Gaza no muri Cisjordaniya yigaruriwe ziri kumvikana ku rwego mpuzamahanga, kandi ko zizarushaho kwiyongera.
Yavuze ko Qatar iri gukorana na Pakistan, Oman ndetse n’ibindi bihugu bigize Akanama k’Ubufatanye k’Ibihugu byo mu Kigobe cy’Abarabu, mu gushaka igisubizo binyuze muri dipolomasi.
Yagize ati: “Uko tuzagera kuri icyo gisubizo vuba, ni ko ingaruka zizagera ku isi yose zizaba nke.”
Ibitekerezo