Abantu 14 barimo abacamanza babiri bakuru b’urwego rw’ubutabera bwa gisirikare muri Repubulika Iharanira Demokarasi ya Congo (RDC) baguye mu mpanuka y’indege yabereye mu Mujyi wa Kenge, mu Burengerazuba bw’icyo gihugu.
Itangazo ry’Ingabo za RDC (FARDC) rivuga ko Liyetena Jenerali Joseph Mutombo Katalayi Tiende, wari Perezida wa mbere w’Urukiko Rukuru rwa Gisirikare, na Liyetena Jenerali Lucien René Likulia Bakumi, wari Umugenzuzi Mukuru mu gisirikare, bari mu ndege yakoze impanuka ku wa Gatanu tariki ya 25 Nzeri 2026.
Iyo ndege yari ivuye mu butumwa bw’akazi i Kikwit, mu Ntara ya Kwilu, igwa igeze i Kenge.
Guverineri wungirije w’Intara ya Kwango, Remy Saki Bokinda yavuze ko iyo ndege yaguye ahantu hatuwe. Yagize ati: “Kubera ko i Kenge nta kibuga cy’indege gihari, indege yaguye ahantu hatuwe n’abaturage.”
Naho Umuvugizi w’igisirikare cya RDC, Majoro Jenerali Efomi Ekenge, yavuze ko abantu 14 baguye muri iyo mpanuka.
Ati: “Abantu bose bari bayirimo bapfuye. Imibiri 12 yangijwe n’umuriro ku buryo kuyimenya byari bigoye, naho uw’umupilote wabonetse hanze y’indege.”
Urwego rushinzwe gukora iperereza ku mpanuka zo mu kirere muri RDC, BPEA, rwatangaje ko iyo ndege yari iyo mu bwoko bwa LET 410 UVP, ikoreshwa na TRACEP Congo Aviation kandi ifite nimero iyiranga ya 9S-GUC.
BPEA yohereje itsinda ry’abahanga aho impanuka yabereye kugira ngo rikusanye amakuru azafasha kumenya icyayiteye. Kugeza ubu, icyatumye indege ihanuka ntikiramenyekana.
Urupfu rw’aba bayobozi rubaye mu gihe RDC ikomeje guhangana n’intambara imaze igihe mu Burasirazuba bw’igihugu. Bombi bari bafite uruhare rukomeye mu manza za gisirikare zirebana n’iyo ntambara.
Inkiko bari bayoboye zagiye zicira imanza abantu bataburanye imbonankubone, barimo abashinjwaga gufasha imitwe yitwaje intwaro. Muri bo harimo Corneille Nangaa, uyoboye ihuriro Alliance Fleuve Congo (AFC).
Bari bafite kandi uruhare mu manza zirebana n’uwahoze ari Perezida Joseph Kabila, washinjwe n’ubutegetsi bwa RDC gushyigikira umutwe wa M23, ndetse no mu ziregwamo bamwe mu bahoze ari abayobozi bakuru b’igisirikare.
FARDC yashimiye aba basirikare bakuru, ivuga ko bari abacamanza b’inararibonye bakoreye igihugu cyabo mu cyubahiro, ubwitange no kutizigama. Iperereza ku cyateye iyo mpanuka rirakomeje.
Ibitekerezo