Ku wa Kabiri tariki ya 22 Nzeri 2026, Minisitiri w’Ubutabera wa Repubulika Iharanira Demokarasi ya Congo n’Inama Nkuru y’Ubucamanza (CSM) bamaganye iyicwa ry’uwari Perezida w’Urukiko rw’Ubujurire rwa Haut-Katanga, Vincent Mwana Mulenda. Yagabweho igitero n’abantu bataramenyekana iwe mu rugo i Lubumbashi, mu ijoro ryo ku wa 20 rishyira ku wa 21 Nzeri 2026.
Mu gihe icyo gitero kibaye umutekano uteye impungenge, inzego z’ubutabera zatangaje ko zatangije iperereza, zinanasaba ko umutekano w’abacamanza warushaho gukazwa.
Minisitiri w’Ubutabera akaba n’ushinzwe kugenzura ikoreshwa ry’ikimenyetso cya Leta, Guillaume Ngefa Atondoko-Andali, yatangaje ko hatangijwe iperereza ryimbitse rigamije gusobanura uko igitero cyabaye, kumenya uko ibyabaye byakurikiranye no gutahura abantu bose babigizemo uruhare.
CSM yasabye ko abacamanza barushaho kurindwa
Inama Nkuru y’Ubucamanza yasabye ko hafatwa ingamba zifatika zo kurinda abakora mu rwego rw’ubutabera. Ishingiye ku ngingo ya 19 y’itegeko ngenga rigenga abacamanza, yasabye inzego zibishinzwe korohereza abacamanza kwemererwa kwitwaza imbunda nto.
CSM yavuze ko kurinda abacamanza ari kimwe mu bisabwa kugira ngo ubutabera bukomeze kwigenga muri Haut-Katanga.
Mwana Mulenda yagabweho igitero cy’abantu bitwaje intwaro iwe mu rugo i Lubumbashi, mu ijoro ryo ku Cyumweru tariki ya 20 rishyira ku wa Mbere tariki ya 21 Nzeri. Yaje kwitaba Imana. Nk’uko CSM ibivuga, abamugabyeho icyo gitero ntibari bakamenyekana.
Ibitekerezo