Urubanza rw’ubujurire rwa Eugène Rwamucyo, wahoze ari umuganga w’Umunyarwanda ufite imyaka 67, rwatangiye kuri uyu wa 9 Kamena 2026 i Paris mu Bufaransa. Rwamucyo yari yarakatiwe mu Kwakira 2024 igifungo cy’imyaka 27 nyuma yo guhamwa n’ibyaha birimo ubufatanyacyaha muri Jenoside yakorewe Abatutsi n’ibyaha byibasiye inyokomuntu.
Muri uru rubanza rw’ubujurire, ashobora gukatirwa igifungo cya burundu.
Hashize imyaka 32 Jenoside yakorewe Abatutsi ihitanye abarenga miliyoni, uru rubanza rushobora kuba ari rwo rusozaho urugendo rurerure rw’ubutabera rwamaze imyaka myinshi. Mu rubanza rwa mbere, Urukiko rwa Paris rwamuhamije icyaha cyo gufatanya mu gukora Jenoside no mu byaha byibasiye inyokomuntu.
Rwamucyo yaburanishijwe n’inkiko z’u Bufaransa hashingiwe ku ihame ry’ububasha mpuzamahanga rituma icyo gihugu gikurikirana abakekwaho ibyaha bikomeye byakorewe aho ari ho hose ku isi. Mu byo yashinjwaga harimo uruhare mu gushyingura imibiri y’abazize Jenoside mu byobo rusange i Butare, kugira uruhare mu iyicwa ry’abakomeretse no gushishikariza abaturage kwibasira Abatutsi mu gihe cya Jenoside.
Ku ruhande rwe, Rwamucyo yakomeje guhakana ibyo aregwa, avuga ko ibirego byaturutse i Kigali bifite impamvu za politiki. Nubwo u Rwanda rwari rwaramushyiriyeho impapuro mpuzamahanga zo kumuta muri yombi, yafatiwe mu Bufaransa muri Gicurasi 2010, imyaka 16 nyuma ya Jenoside. Icyo gihe yakoraga mu bitaro byo mu mujyi wa Maubeuge mu majyaruguru y’u Bufaransa.
Muri uru rubanza rw’ubujurire, Rwamucyo yahinduye burundu uburyo yireguramo ndetse yifashisha itsinda rishya ry’abanyamategeko barindwi, mu gihe mbere yari afite babiri gusa. Abamwunganira bavuga ko ukuri kw’amateka kudakwiye gusimbura ukuri kugenwa n’urukiko, kandi ko umukiriya wa bo yakomeje kuvuga ko ari umwere.
Muri uru rubanza, abantu 530 baregeye indishyi bazongera guhagararirwa. Biteganyijwe ko urubanza ruzasozwa n’icyemezo kizatangazwa tariki ya 17 Nyakanga 2026.
Ibitekerezo