Abahanzi Nyarwanda barimo The Ben, Bruce Melodie na Element Eleéeh bari mu bahanzi batoranyijwe guhatanira ibihembo bya HiPipo Music Awards 2026, irushanwa rihuza abahanzi bakomeye bo mu bihugu bitandukanye bya Afurika.
Urutonde rw’abahanzi n’indirimbo bizahatana mu byiciro bitandukanye rwatangajwe n’abategura ibi bihembo mu ijoro ryo ku wa 4 Ukwakira 2026, nyuma yo kubimenyesha abakunzi babo banyuze ku mbuga nkoranyambaga.
Amakuru yatangajwe n’Imvaho nshya avugako The Ben, ufite indirimbo ‘Inshallah’, azahatana mu cyiciro cy’indirimbo ikunzwe muri Afurika y’Iburasirazuba. Muri iki cyiciro kandi harimo ‘Pom Pom’ ya Bruce Melodie ndetse na ‘Ayayaah’ ya Element EleéeH.
The Ben kandi afite andi mahirwe yo kwegukana igihembo, kuko ari mu bahataniye icyiciro cya East Africa Best Artist ndetse n’icya Africa Number One.
Mu cyiciro cya Africa Number One, The Ben azaba ahanganye n’ibyamamare bikomeye ku mugabane wa Afurika birimo Burna Boy, Joshua Baraka, Diamond Platnumz, Rema, Tems, Ayra Starr, Tyla na Wizkid.
Ku rundi ruhande, Bruce Melodie na we azaba ahatanira intsinzi binyuze mu ndirimbo ye ‘Pom Pom’, iri mu cyiciro kirimo n’izindi ndirimbo zakunzwe ku rwego mpuzamahanga, zirimo ‘Only God Can Save Me’ ya Adekunle Gold na Davido, ‘Heaven Baby’ ya Ayra Starr na Zayn Malik, ‘Finale’ ya Bien-Aimé Baraza na Ali Kiba ndetse na ‘Dai Dai’ ya Burna Boy na Shakira.
Umuhanzi n’umuhanga mu gutunganya umuziki Element EleéeH, amazina ye akaba ari Mugisha Robinson, na we ari mu bahataniye igihembo cya East Africa Best Artist. Muri iki cyiciro azahatana n’abahanzi bakomeye barimo Diamond Platnumz, Jose Chameleone, Bien-Aimé Baraza na Ali Kiba.
Mu bindi byiciro, abahanzi nka Ava Peace, Joshua Baraka, Stream of Life Choir, Dax Vibez, Nandor Love UG, King Saha, Sheebah, Elijah Kitaka, Cindy Sanyu na Eddy Kenzo bazahatana mu cyiciro gikomeye cya Artist of the Year.
HiPipo Music Awards 2026 izaba ku nshuro ya 15. Ibihembo biteganyijwe gutangwa ku wa 13 Ugushyingo 2026, mu birori bizabera kuri Kampala Serena Hotel muri Uganda, aho abahanzi bazaba bahuriye hamwe n’abakora mu ruganda rw’imyidagaduro muri Afurika.
Ibitekerezo