Trump na Xi Jinping baganiriye ku ntambara ya Iran: Hari ibyo Ubushinwa bwemereye Amerika
Mu gihe Perezida w’Amerika, Donald Trump, akomeza uruzinduko rwe mu Bushinwa ku munsi wa kane, kuri uyu wa Gatanu, ikibazo cy’intambara ya Iran cyongeye kugarukwaho mu biganiro yagiranye na Perezida w’Ubushinwa, Xi Jinping, hamwe n’ibindi bibazo birebana n’ubucuruzi, Taiwan ndetse n’umutekano wo mu karere.
Trump yavuze ko we na Xi baganiriye ku mugambi wa Iran wo gukora intwaro za nikleyeri ndetse n’ibibazo byo mu Burasirazuba bwo Hagati. Yavuze kandi ko Tehran yari “igeze hafi cyane” yo kubona izo ntwaro mbere y’uko Amerika itera ibigo byo muri Iran bikekwa ko bifitanye isano n’uwo mugambi.
Trump yongeye gusaba Iran kwemera kugirana amasezerano n’Amerika, avuga ko ukwihangana kwa Washington kugenda gushira.
Trump kandi yavuze ko Xi Jinping yamwemereye ko Ubushinwa butazatanga ibikoresho bya gisirikare kuri Iran, nubwo Beijing izakomeza kugura peteroli ya Iran. Yongeyeho ko aba bayobozi bombi bashimangiye akamaro ko gukomeza gufungura inzira ya Hormuz, inzira y’ingenzi ikoreshwa mu gutwara peteroli ku isi.
Muri ibyo biganiro kandi, Minisiteri y’Ububanyi n’Amahanga y’Ubushinwa yasabye impande zose gushaka umuti binyuze mu biganiro, ivuga ko iyo ntambara “itari ikwiye kubaho” kandi ko hakenewe igisubizo cyihuse gishingiye kuri dipolomasi.
Nubwo uruzinduko rwa Trump rwari rwibanze cyane ku mubano hagati y’Amerika n’Ubushinwa ndetse n’ubukungu, ikibazo cya Iran na cyo cyabaye kimwe mu byagarutsweho cyane hagati y’abo bayobozi bombi.
