Ikipe y’Igihugu y’u Rwanda y’abagore muri Volleyball yakomeje kwitwara neza muri Shampiyona Nyafurika y’Ibihugu ya 2026, nyuma yo gutsinda Ghana amaseti 3-1, ihita ibona itike yo gukina imikino ya ½ cy’irangiza.
Uyu mukino wa ¼ cy’irangiza wabaye kuri uyu wa Kabiri, tariki ya 1 Nzeri 2026, muri Kasarani Indoor Arena i Nairobi muri Kenya. Intsinzi yatumye u Rwanda rwisanga mu makipe ane ya mbere ku mugabane w’Afurika.
U Rwanda rwatangiye umukino rufite imbaraga, rwegukana iseti ya mbere ku manota 25-17. Ghana yaje kwigaranzura u Rwanda mu iseti ya kabiri, iyitsinda bigoranye ku manota 26-24, amakipe yombi aba anganyije iseti imwe kuri imwe.
Abakinnyi b’u Rwanda ntibacitse intege, kuko mu iseti ya gatatu bongeye gushyira igitutu kuri Ghana, bayitsinda ku manota 25-19. Mu iseti ya kane ari na yo yabaye iya nyuma, u Rwanda rwakomeje kwiharira umukino, ruyegukana ku manota 25-18, rusoza umukino rutsinze amaseti 3-1.
Kapiteni w’Ikipe y’Igihugu, Valentine Munezero, yabwiye BBC Gahuza ko bishimiye iyi ntsinzi nubwo umukino utari woroshye. Yagaragaje ko intego ari ugukomeza kwitanga no kwitegura neza umukino ukurikiraho.
Muri ½ cy’irangiza, u Rwanda rutegereje ikipe iza gutsinda hagati ya Misiri na Tunisia.
Kugera muri iki cyiciro ni ubwa kabiri bwikurikiranya ku Rwanda, nyuma yo no kugera muri ½ cy’irangiza cya Shampiyona Nyafurika ya 2023 yabereye muri Cameroun.
Iri rushanwa rifite agaciro kihariye kuko amakipe atatu ya mbere azabona itike yo kwitabira Igikombe cy’Isi cya Volleyball y’Abagore cya 2027, mu gihe ikipe izegukana igikombe cya Afurika izahita ibona itike y’Imikino Olempike ya Los Angeles 2028.
Ibi bivuze ko gutsinda umukino wa ½ cy’irangiza byatuma u Rwanda rugera ku mukino wa nyuma ndetse rukaba rwizeye umwanya mu makipe atatu azahagararira Afurika mu Gikombe cy’Isi cya 2027.
Ibitekerezo