Nk’uko bitangazwa n’ibitangazamakuru byo mu Butaliyani, abajura bibye amacupa ya divayi agera ku 30,000 afite agaciro ka miliyoni 5 z’amayero (arenga miliyari 8 Frw) mu ruganda rukomeye rukora divayi muri icyo gihugu.
Ikigo Marchesi Antinori, kimwe mu bigo bikomeye by’imiryango bikora divayi mu Butaliyani, cyatangaje ko ubujura bwakorewe mu bubiko bwacyo buherereye i Tuscany bwabaye ku wa Gatandatu, mu gihe iki kigo cyiteguraga kohereza izo divayi ku bakiriya bo mu mahanga.
Bikekwa ko nibura abagabo barindwi bipfutse mu maso ari bo babanje guhagarika ibyuma bivuza impuruza na camera z’umutekano, maze bakoresha imashini z’icyo kigo ziterura imitwaro mu gupakira amakamyo manini abiri divayi zabo zikomeye zo mu bwoko bwa Tignanello, Solaia na Guado al Tasso zo mu bwoko bwa divayi itukura yo muri Tuscany.
Renzo Cotarella, umuyobozi mukuru w’icyo kigo, yabwiye ikinyamakuru Corriere della Sera cyo mu Butaliyani ko ubu ari bwo bujura bunini bwo muri ubu bwoko bubaye mu Butaliyani.
Yagize ati: “Ubujura nk’ubu kandi bufite agaciro kangana gatya ntibwigeze bubaho mu Butaliyani”.
Yongeyeho ko afite icyizere ko inzego zishinzwe umutekano zizabasha gukurikirana iyo divayi yibwe.
Ati: “Amakamyo abiri yuzuye ibicuruzwa ntashobora kubura gutyo gusa. Imihanda yo muri Tuscany yuzuyemo za camera – wenda ku bw’amahirwe make dushobora kuzabona nibura amwe mu macupa yacu yibwe.”
Yabwiye ikinyamakuru Financial Times ati: “Izi divayi zifite agaciro gakomeye kandi sinzi uburyo bashobora kuzigurisha ku isi hose badafashwe”.
Iki kigo gikeka ko amahitamo y’ayo macupa — asanzwe agurishwa hagati y’amayero 150 na 500 buri rimwe — yerekana ko abajura bari abantu basobanukiwe cyane ibijyanye na divayi kandi bafite amakuru y’imbere mu kigo.
Ubujura bwamenyekanye ku wa Mbere mugitondo ubwo abakozi bageraga aho ibintu byabereye. Kugeza ubu nta muntu n’umwe urafatwa mu bakekwaho ubu bujura.
Ikigo Marchesi Antinori cyashinzwe mu 1385 kandi cyohereza ibicuruzwa byacyo mu bihugu 170. Umwaka ushize cyinjije miliyoni 263 z’amayero (miliyari zirenga 430 Frw).
Muri uyu mwaka hagiye habaho ibikorwa byinshi byo kwiba divayi mu Butaliyani, harimo na bibiri byabereye mu gace ka Piedmont ko mu majyaruguru, aho bivugwa ko hibwe amacupa afite agaciro k’amadorari menshi cyane.
Ibitekerezo