Umusirikare w’ingabo z’Ubwongereza zirwanira mu mazi, Teddy Young, yagejejwe mu rukiko akurikiranyweho kunekera Uburusiya.
Young w’imyaka 24 usanzwe ari inzobere mu butasi bukoreshwa mu ntambara, yitabye urukiko rwa Westminster i Londres kuri uyu wa Kane tariki ya 8 Ukwakira 2026 kugira ngo akurikiranwe hashingiwe ku itegeko ry’umutekano w’igihugu.
Urukiko rwabwiwe ko uyu musirikare ashinjwa kubika amakuru y’ingabo z’Ubwongereza yari afite uburenganzira bwo kugeraho no gutegura kuyashyikiriza igihugu cy’amahanga.
Nk’uko BBC yabitangaje bu byaha ashinjwa harimo guhindura ubutumwa mu Kirusiya no gushaka urubuga rwo kuri interineti rushishikariza abantu guha amakuru Uburusiya.
Ubwo yageraga mu rukiko, Young yari yambaye umupira w’ikigina w’amaboko maremare yahawe na polisi. Yavuze gusa amazina ye, itariki y’amavuko n’aho atuye i Clapham, hafi y’Umujyi wa Bedford.
Ibyaha aregwa ntibirahamwa n’urukiko.
Ibyaha aregwa birimo gutegura gutangaza amakuru arinzwe, kuyabona, kuyandukura, kuyafata mu buryo bw’amajwi cyangwa amashusho, ndetse no kuyabika agamije kuyaha igihugu cy’amahanga.
Ubushinjacyaha buvuga ko ibyo bikorwa byabaye hagati y’itariki ya 26 Ugushyingo 2024 n’itariki ya 21 Gicurasi 2025.
Yang yatawe muri yombi ku wa Kabiri, afatiwe mu gace ka Bedfordshire. Ibyaha aregwa ntarabihamywa n’urukiko.
Ibitekerezo