Umubare w’abahitanywe n’umutingito ukomeye wibasiye ikirwa cya Flores muri Indonesia umaze kugera kuri 51, mu gihe ibikorwa byo gushakisha ababa bag trapped munsi y’ibisigazwa by’inzu bikomeje.
Uyu mutingito wari ufite ubukana bwa 7.7 wabaye mu rukerera rwo ku wa Gatandatu, tariki ya 15 Kanama 2026, wibasira Intara ya East Nusa Tenggara. Ikigo cya Indonesia gishinzwe iby’ubumenyi bw’ikirere n’imitingito, BMKG, cyatangaje ko izingiro ryawo ryari mu nyanja, ku birometero 30 mu majyaruguru ashyira uburasirazuba bwa Nagekeo, ku bujyakuzimu bwa kilometero 15.
Amakuru mashya yatangajwe n’inzego z’ubutabazi agaragaza ko abantu nibura 113 bakomeretse, naho abarenga 5,000 bakuwe mu byabo. Bamwe bacumbikiwe mu bibuga by’imikino no mu mahema, mu gihe abandi bakomeje kurara hanze kubera gutinya indi mitingito ishobora gukurikiraho.
Nyuma y’umutingito wa mbere, humvikanye indi mitingito mito irenga 340, ikomeye muri yo ikaba yari ifite ubukana bwa 6.2. Abaturage bari batuye hafi y’inkombe bahise bahungira ahantu hirengeye kubera impungenge za tsunami. Umuburo wari watanzwe waje gukurwaho nyuma y’amasaha hafi atatu, ubwo byagaragaraga ko nta muvumba ukomeye w’amazi wari utegerejwe.
Ibikorwa by’ubutabazi bikomeje kugorwa n’inkangu zafunze imihanda, ibura ry’amashanyarazi ndetse n’ihungabana ry’itumanaho. Umuhanda wa Trans-Flores, ufatiye runini ubwikorezi kuri icyo kirwa, wangiritse ahantu hatandukanye, bituma kugera mu duce twitaruye bigorana.
Mu mujyi wa Maumere, bamwe mu barwayi bavuriwe hanze kubera ko inyubako z’amavuriro zangiritse. Ibura ry’amashanyarazi ryatumye sitasiyo nibura 20 zitanga ibikomoka kuri peteroli zihagarika imirimo.
Inzego za Indonesia zohereje abasirikare n’abapolisi barenga 3,500 kugira ngo bafatanye n’abatabazi gushakisha ababuze, gukuraho ibisigazwa by’inyubako no kugeza ibiribwa, amazi n’imiti ku baturage.
Amazu arenga 1.300 yangiritse, hamwe n’amashuri, amavuriro, insengero n’izindi nyubako rusange. Abategetsi bavuga ko imibare y’abapfuye n’ibyangiritse ishobora gukomeza kwiyongera uko abatabazi bagera mu duce twari twarafunzwe n’inkangu.
Indonesia ikunze kwibasirwa n’imitingito n’iruka ry’ibirunga kubera ko iri mu gace kazwi nka Pacific Ring of Fire. Mu 1992, undi mutingito ukomeye wibasiye Flores ukurikirwa na tsunami, uhitana abantu bagera ku 2,500.
Ibitekerezo