Umwe mu bayobozi b’ishyaka UDPS rya Perezida Félix Tshisekedi, Karondwa Mwanaweka Marie-Célestin Bytaty, yarakubiswe kugeza apfuye azize ibikomere ubwo yari avuye mu kiganiro kuri radiyo cyashishikarizaga abaturage kwirinda Ebola.
Uyu Karondwa yari umuyobozi w’agateganyo wa UDPS i Butembo, mu Ntara ya Kivu y’Amajyaruguru, akaba n’umuvugizi w’iryo shyaka muri ako gace. UDPS ivuga ko yagabweho igitero ku wa 27 Nzeri 2026, nyuma yo kuva gutanga ikiganiro kuri Radio Mwangaza. Iryo shyaka rivuga kandi ko inzu ye yatwitswe, ibintu bye bikangizwa.
UDPS ivuga ko igitero gifitanye isano n’uko Karondwa yari amaze gusobanurira abaturage ko Ebola iriho kandi ko bagomba kuyirinda. Icyakora, abagabye icyo gitero n’impamvu yabibateye ntibiramenyekana. Iryo shyaka ryasabye inzego zibishinzwe gukora iperereza no gufata ababigizemo uruhare, risaba abayoboke baryo gutuza no kubahiriza amategeko.
Urupfu rwe rubaye mu gihe Repubulika Iharanira Demokarasi ya Congo ikomeje guhangana n’icyorezo cya Ebola giterwa na virusi yo mu bwoko bushya bwa Bundibugyo. Imibare yatangajwe ku wa 26 Nzeri 2026 igaragaza ko abantu 8,067 bari bamaze kwandura, muri bo 3,901 bakaba barapfuye. Intara ya Ituri ni yo yibasiwe cyane kurusha izindi.
Ibitekerezo