Umwe mu bayobozi b’abatavuga rumwe n’ubutegetsi muri Venezuela, María Corina Machado, yagarutse mu gihugu cye nyuma y’amezi arenga icumi yari amaze mu buhungiro, mu gihe hakomeje kugaragara ibibazo bya politiki.
Ku Cyumweru cy’ejo hashize, Machado yatangaje ku rubuga rwa X rwahoze rwitwa Twitter ubutumwa bugira buti: “Ndi hano. Ndi kumwe namwe”. Yatashye nyuma y’igihe yari amaze agerageza gusubira mu gihugu, ariko ntibimukundire.
Machado yari yaravuye muri Venezuela mu ibanga, agenda nijoro mu bwato bwihuta, yerekeza muri Norvège kwakira Igihembo cy’Amahoro cyitiriwe Nobel.
Muri Mutarama uyu mwaka, hashize ukwezi avuye mu gihugu, ingabo z’Amerika zagabye igitero gitunguranye mu rugo rwa Perezida Nicolás Maduro, uwo bari bahanganye muri politiki, ziramufata.
Nyuma y’ifatwa rya Maduro, ubutegetsi bwa Perezida Donald Trump bwashyigikiye ko uwari umwungirije, Delcy Rodríguez, ayobora igihugu mu nzibacyuho. Rodríguez amaze gufata izo nshingano, yasinye amasezerano yerekeye ibikomoka kuri peteroli yahaye Amerika inyungu nyinshi.
Ejo hashize tariki ya 25 Ukwakira 2026, Machado yagaragaye yitabiriye misa muri kiliziya yo muri Leta ya Lara. Abamushyigikiye bamwakiranye ibyishimo, baramuhobera, abandi bamufata ibiganza.
Nyuma ya misa, yakomereje urugendo mu murwa mukuru Caracas, aherekejwe n’abamushyigikiye bamwakirizaga amashyi n’impundu.
Yageze i Caracas mu ijoro ryo ryakeye, agaragara amwenyura, asohoye umutwe mu mwanya ufunguka hejuru y’imodoka, asuhuza abari baje kumwakira.
Ibitekerezo