Mugitondo cyo kuri uyu wa Kane tariki ya 25 Kamena 2026, Perezida w’inzibacyuho wa Venezuela Rodríguez, yavuze ko abantu barenga 32 bapfuye, abandi 700 barakomereka nyuma y’imitingito ikomeye yibasiye iki gihugu ku mugoroba wo ku wa Gatatu.
Iyi mitingito yari ku gipimo cya “magnitude” ya 7.2 na 7.5 yibasiye ibice bitandukanye by’igihugu ndetse Perezida yavuze ko umubare w’abashinzwe ibikorwa by’ubutabazi ugiye kwiyongera mu rwego rwo kumenya umubare w’inzu zasenyutse, uw’abakomeretse n’abapfiriye muri iyo mitingito.
Leta ya La Guaria yibasiwe cyane, nk’uko yabitangaje. Yagize ati: “Inyubako nyinshi zasenyutse kandi turi gukora akazi katoroshye ko kurokora ubuzima bw’abo Imana itarakuraho amaboko. Leta ya La Guaira ihanganye n’aya makuba ya nyayo kandi yabaye indiri y’ibiza”.
Imitingito ikomeye cyane yaherukagabkwibasira Venezuwela mu myaka irenga ijana ishize, yagize ingaruka zikomeye muri ako karere, aho ibikorwa byo mu nyubako bimwe byimuwe mu mijyi no mu turere twagizeho ingaruka, byimurirwa hafi y’Amazon yo muri Brezili, mu bilometero 1,700 uvuye mu murwa mukuru wa Venezuwela, Caracas.
Rodríguez yavuze ko imitingito yangije inafunga ikibuga cy’indege mpuzamahanga cya Simón Bolívar hafi ya Caracas, ari na cyo kibuga cy’indege kinini cyo muri icyo gihugu, yongeraho ko serivisi za gari ya moshi na gaze karemano muri Caracas zahagaritswe. Yasabye Abanya-Venezuwela gutanga raporo ku byangiritse byose binyuze kuri porogaramu yashyizweho na leta.
Rodríguez yavuze ko amashuri azafunga mu gihe cy’iminsi myinshi. Minisiteri y’Uburezi yavuze ko inyubako zimwe z’amashuri zizakoreshwa nk’ahantu ho gucumbikira no gutanga imfashanyo.
Rodríguez, yasabye abaganga bose ko bagomba kwihutira kugera ku bitaro kugira ngo bafashe abakomeretse. Yagize ati: “Turasaba ubumwe.”
Itsinda ry’abashakashatsi ku birebana n’imiterere y’ubutaka ryo muri Amerika ryabanje kuvuga ko umutingito wa mbere wari ufite “magnitude” ya 7.1, nyuma ugera kuri 7.2. Aho watangiriye hari mu burengerazuba bwa Morón ku nkombe za Karayibe mu gihugu nko mu bilometero 168 mu burengerazuba bwa Caracas. Umutingito wari ufite ubujyakuzimu bwa kilometero 22.
Iri tsinda ry’abashakashatsi ryatangaje ko hari umutingito munini cyane wa 7.5 nyuma y’umunota umwe gusa. Umutingito wa kabiri wari ufite ubujyakuzimu bwa kilometero 10, ukanagira ubujyakuzimu bwa kilometero 16 mu majyepfo y’uburengerazuba bwa Morón.
Muri leta ya Falcon iri ku nkombe z’inyanja, Guverineri Víctor Clark yavuze ko abantu 32 bari mu bitaro kandi ko hari abantu 15 babuze uko barokorwa mu masaha make nyuma y’umutingito.
Guverinoma zitandukanye zirimo Leta Zunze Ubumwe z’Amerika, Arijantine (Argentine), Boliviya, Brezili, Shili, Ekwateri, El Salvador, Megizike, Panama na Uruguay zatanze ubufasha.
Jeremy P. Lewin, Umunyamabanga wungirije wa Leta Zunze Ubumwe z’Amerika ushinzwe ubufasha bw’amahanga, yavuze ko Minisiteri y’Ububanyi n’Amahanga yashyizeho itsinda rishinzwe gufasha mu biza n’itsinda rishinzwe gukurikirana ubufasha burimo amatsinda ashinzwe gushakisha no gutabara, ibikoresho by’ubuvuzi n’iby’ubutabazi n’ibindi bikoresho ku bufatanye na guverinoma y’agateganyo ya Venezuwela.
Perezida wa El Salvador Nayib Bukele, wahoze arwanya guverinoma ya Venezuwela, mu butumwa yashyize kuri X ku wa Gatatu nijoro, yavuze ko yatanze ubufasha.
Bukele yanditse ati: “Tubijeje ubufatanye bwacu bwose kandi tuberekejeho n’amasengesho yacu. Mukomere, Venezuwela”.
Perezida wa Ekwateri, Daniel Noboa yavuze ko yategetse ko hatangwa ubufasha bw’ubutabazi bwihuse kugira ngo habeho guhangana n’ikibazo cy’ubutabazi.
Noboa yanditse ati: “Ekwateri irihutira gutabara no gukora ibishoboka byose muri ibi bihe, nubwo hari ibyo tutumvikanaho bikomeye, kwita ku buzima bw’abantu bigomba kuza imbere mu byo umuyobozi ashinzwe”.
Perezida wa Boliviya, Rodrigo Paz, yatangaje ko hari ikibazo cy’ubutabazi mu gihugu cye nyuma y’ibyumweru byinshi by’imyigaragambyo yo kurwanya leta, yavuze ko igihugu cye cyiteguye gutanga ubufasha ubwo ari bwo bwose bukenewe.
Ubuyobozi bwa Perezida wa Brezili, Luiz Inácio da Silva, bwagaragaje ko biteguye ubufaranye kandi ko nta Munya-Brezili wavuze ko yakomeretse.
Mu gihe cy’iyi mitingito, abantu bavanywe mu nyubako zari zibasiwe n’imitingito muri Caracas, benshi bagaragaraga ko bakomerekejwe n’inkuta zasenyutse zasize ibikoresho byo mu nzu byanamye. Umukungugu mwinshi wagaragaraga mu duce tubiri duturanye n’umurwa mukuru dufite amaresitora menshi n’ibindi bikorwa by’ubucuruzi.
Abantu bakomeje guhagarara ku mihanda amasaha menshi, bamwe bicaye hasi bafite amatungo ubwo ivumbi ryari ribakikije. Inyubako zasenyutse, inkingi z’amashanyarazi zirasenyuka n’imyanda yuzuye mu mihanda. Ibice by’umurwa mukuru byabuze amashanyarazi ndetse n’amatelefone ava ku mirongo.
Hector Ricci utuye muri Caracas yagize ati: “Byatangiye buhoro buhoro hanyuma biriyomgera, amaherezo twese twasohotse mu nzu duteranira hamwe”.
Roberto Gamas, undi muturage wa Caracas, yavuze ko inyubako yari arimo “yatigize cyane impande zose n’umuvuduko mwinshi cyane”.
Kudakora kwa telefoni zigendanwa mu bice bimwe na bimwe bya Venezuwela byarushijeho gukaza imihangayiko y’imiryango myinshi, cyane cyane ubwo abantu barenga miliyoni 7.7 bavuye muri icyo gihugu mu gihe cy’ibibazo bikomeye.
María Corina Machado, umuyobozi w’abatavuga rumwe n’ubutegetsi muri Venezuwela, wari mu buhungiro nyuma yo kuva muri Venezuwela mu Kuboza, yagiye kuri X yohereza amasengesho no kwifuriza imbaraga Abanya-Venezuwela.
Yagize ati: “Imbaraga, ituze, n’ubufatanye bikomeze hagati yacu muri iki gihe kigoye”.
Minisitiri w’Ubutegetsi bw’Igihugu wa Venezuwela, Diosdado Cabello, yavuze ko umutingito ushobora kumvikana muri leta nyinshi, asaba abatwara imodoka guha umwanya imbangukiragutabara n’izindi modoka z’ubutabazi.
Hari inzu zituwemo n’izindi nyubako zasenyutse mu gace k’Altamira, nk’uko yabivuze, bigaragaza ko abantu bakomeretse.
Ubwo yari kuri televiziyo y’igihugu, yagize ati: “Turabyumva ko hari abantu bashobora kuba bafite agahinda, ariko turi gukora dukurikije amabwiriza yo gutanga ubufasha n’ubutabazi kugira ngo dufashe ababukeneye cyane kurusha abandi”.
Yasabye abantu kuguma hanze kuko imitingito ishobora kwangiza inyubako kurushaho.
“Mwitondere cyane abana n’abageze mu za bukuru. Hamagarana kandi murebe niba nta muntu wagize icyo aba.”
Abakorera mu nyubako zo muri Manaus, Belem na Macapá muri Amazon muri Brezili bimuwe, nk’uko byatangajwe kuri TV Globo.
Iyo mitingito yumvwaga no mu turere twa Karayibe no mu majyaruguru y’uburasirazuba bwa Kolombiya, ariko nta raporo z’ibyangiritse cyangwa ibikomere byagaragaye.
Ikigo cy’Ubuhanuzi cya Tsunami yo mu Nyanja ya Pasifika cyatanze ubutumwa bwinshi bwa tsumani nyuma y’imitingito yakuweho vuba.
Imitingito ikomeye ntabwo isanzwe muri Venezuwela.
Nubwo Venezuwela iri hafi y’imirongo myinshi y’ibiza, aho iherereye hejuru y’ibice by’Amerika y’Epfo na Karayibe bituma imitingito idakunze kugaragara cyane kurusha mu bindi bice by’Amerika y’Epfo.
Imitingito ikunze kugaragara ku nkombe za Pasifika, harimo no muri Megizike na Shili, byombi biri ku nkengero z’umugezi wa tectonic uzwi nka Ring of Fire, agace Ikigo gishinzwe imiterere y’ubutaka cy’Amerika cyavuze ko ari ko gatera 90% by’imitingito.
Ibitekerezo