Leta Zunze Ubumwe z’Amerika zashyigikiye uburenganzira bw’ikipe y’igihugu y’Argentine bwo gutanga ibitekerezo ku mugaragaro, nyuma y’uko abakinnyi ba yo bazamuye icyapa cyanditseho “Las Malvinas son Argentinas” (bisobanuye ngo “Ibirwa bya Falkland ni ibya Argentine”) ubwo bishimiraga intsinzi bari bamaze kubona mu mukino w’Igikombe cy’Isi bakinnye n’Ubwongereza.
Icyo gikorwa cyakuruye impaka zikomeye ku rwego mpuzamahanga, aho bamwe bavuga ko cyarenze ku mabwiriza ya FIFA abuza gukoresha amarushanwa ya siporo mu gutambutsa ubutumwa bwa politiki, mu gihe abandi bavuga ko ari uburenganzira bwo kugaragaza ibitekerezo.
Nk’uko byatangajwe n’Ibiro bya Perezida w’Amerika (White House), Andrew Giuliani, uyoboye itsinda rishinzwe ibikorwa bya FIFA muri White House, yavuze ko abakinnyi b’Argentine bafite uburenganzira bwo kuvuga icyo batekereza.
Yagize ati: “Muri Leta Zunze Ubumwe z’Amerika twemera uburenganzira bwo gutanga ibitekerezo nk’uko burengerwa n’Itegeko Nshinga ryacu. Bari bafite amahirwe n’uburenganzira bwo kuvuga ibyo bashakaga.”
Aya magambo ashobora kurushaho gukaza ubushyamirane hagati y’ibihugu birebwa n’iki kibazo, cyane cyane ko Ubwongereza bwo bwasabye FIFA gukora iperereza kuri icyo gikorwa.
Ibiro bya Minisitiri w’Intebe w’Ubwongereza (Downing Street) byatangaje ko bishyigikiye ko FIFA ikora iperereza ku bakinnyi ba Argentine.
Umuvugizi wa Minisitiri w’Intebe yavuze ati: “Igikombe cy’Isi gishobora kuba kitari icyacu, ariko Ibirwa bya Falkland byo ni iby’Ubwongereza. Kwiyemeza kubirinda ntibizigera bihinduka.”
Yanongeyeho ko niba hari ibihano bizafatwa, ari FIFA ifite ububasha bwo kubifata hakurikijwe amategeko agenga umupira w’amaguru ku isi.
Guverinoma y’Ibirwa bya Falkland yatangaje ko yababajwe n’icyo cyapa, nubwo yavuze ko itatangajwe n’icyabaye.
Mu itangazo yashyize ahagaragara yagize iti: “Ntidushaka ko politiki yinjizwa muri siporo. Ntidushaka kandi ko abaturage b’ibi birwa bakoreshwa nk’intwaro ya politiki igihe cyose habaye umukino uhuza Ubwongereza n’Argentine.”
Yanahamagariye FIFA gukurikiza amategeko ya yo no guhana imyitwarire yose ishobora gushyira politiki mu marushanwa ya siporo.
Mu mwaka wa 2013, abaturage b’Ibirwa bya Falkland bakoze referandumu yo kwihitiramo igihugu bashaka kubamo.
Mu bantu 1,517 batoye, 1,513 batoye bashyigikira ko ibyo birwa bikomeza kuba Intara y’Ubwongereza yo hakurya y’inyanja, mu gihe abantu batatu gusa batoye babirwanya.
Ibi ni bimwe mu byo Ubwongereza bushingiraho buvuga ko abaturage b’ibi birwa bamaze kwihitiramo ubuyobozi bashaka.
Visi Perezida w’Argentine yongeye gushimangira ko Falkland ari iya bo
Nyuma y’intsinzi ikipe ya Argentine yabonye, Visi Perezida w’icyo gihugu Victoria Villarruel yashyize ubutumwa ku rubuga X avuga ko uwo mukino utari umukino usanzwe.
Yanditse ati: “Ibirwa bya Malvinas ni iby’Argentine. Bashatse kubuza ko tubizana muri stade, ariko bibagiwe ko tubitwaye mu maraso no mu mitima yacu.”
Yaherekeje ubu butumwa amashusho agaragaza abasirikare b’Argentine, ibintu byongeye gukurura impaka ku mbuga nkoranyambaga.
Si ibyo gusa kuko nyuma yo gutsinda Misiri ibitego 3-2 mu mukino wa 1/8 cy’irangiza, bamwe mu bakinnyi b’Argentine banaririmbye indirimbo zigaruka ku Birwa bya Falkland ndetse banashimira ibyamamare by’umupira w’amaguru birimo Diego Maradona na Lionel Messi.
FIFA ishobora guhana Argentine
Amategeko ya FIFA abuza amakipe, abakinnyi cyangwa abayobozi gukoresha amarushanwa y’umupira w’amaguru mu gutambutsa ubutumwa bwa politiki cyangwa ubundi bushobora guteza amacakubiri.
Ni yo mpamvu FIFA yatangaje ko iri gusuzuma niba icyo cyapa n’izo ndirimbo byaba byarishe ayo mategeko. Niramuka isanze hari amakosa yakozwe, ishobora gufatira Argentine ibihano birimo ihazabu, kuburira ikipe cyangwa ibindi bihano biteganywa n’amategeko yayo.
Amateka y’amakimbirane kuri Falkland (Malvinas)
Ibirwa bya Falkland, Argentine yita Islas Malvinas, biherereye mu Nyanja ya Atlantika y’Amajyepfo kandi bimaze imyaka myinshi bitavugwaho rumwe hagati y’Ubwongereza n’Argentine.
Mu 1982, amakimbirane hagati y’ibihugu byombi yavuyemo intambara yamaze iminsi 74 nyuma y’uko ingabo z’Argentine zifashe ibyo birwa zivuga ko ari ibyazo.
Ubwongereza bwohereje ingabo zagaruye ibyo birwa ku butegetsi bwa bwo.
Iyo ntambara yahitanye abasirikare 255 b’Ubwongereza, abaturage batatu bo muri Falkland ndetse n’abasirikare 649 b’Argentine. Nubwo intambara yarangiye, ikibazo cy’ubusugire bw’ibi birwa kiracyari impaka kugeza n’ubu.
Siporo n’ibibazo bya politiki
Abasesenguzi bavuga ko nubwo siporo ifatwa nk’urubuga ruhuza abantu, amateka agaragaza ko kenshi yakoreshejwe mu gutambutsa ubutumwa bwa politiki cyangwa ubukangurambaga bw’ibihugu. FIFA na Komite Mpuzamahanga Olempike (IOC) byakomeje gushimangira ko amarushanwa agomba kuguma ari ay’imikino gusa, ariko kenshi haboneka ibikorwa bituma politiki yivanga muri siporo.
Kugeza ubu, isi y’umupira w’amaguru itegereje umwanzuro wa FIFA ku myitwarire y’ikipe ya Argentine, mu gihe impaka ku busugire bw’Ibirwa bya Falkland zikomeje kuba kimwe mu bibazo bya dipolomasi bimaze imyaka irenga ine by’amakumyabiri bidafitiwe umuti hagati y’Ubwongereza n’Argentine.
Ibitekerezo