Indege ya gisivili yari igonganye n’iy’igisirikare cy’Amerika
Ubuyobozi bw’igisirikare mu majyepfo y’Amerika bwatangaje ko hari gukorwa iperereza nyuma y’uko indege y’abagenzi ya JetBlue yari igiye kugongana n’indege ya gisirikare y’Amerika yari iri mu kirere cyo hafi ya Venezuela.
Iyo ndege ya gisirikare, isanzwe itwara igitoro iha izindi ndege z’Amerika mu kirere, yari ifite igikoresho kizwi nka “transponder”, gitanga amakuru y’aho indege iherereye, itari icanye, bituma abagenzuzi b’indege batabona aho iherereye bituma no kumenya intera yari hagati y’izo ndege zombi bigorana.
Umupilote wa JetBlue yavuze ko indege zombi zari hafi kugongana, aho indege ya gisirikare yanyuze hafi mu ntera ya kilometero 3–4, ariko nyuma iza kwerekeza mu kirere cya Venezuela. JetBlue yemeje ko abakozi ba yo bari mu ndege bamenyesheje ibyabaye kandi ko bazitabira iperereza ryose.
Mu majwi yafashwe, umupilote wa JetBlue yagize ati: “Habuze gato ngo tugongane mu kirere hano. Transponder ya bo ntiyari icanye byari biteye ubwoba”.
Indege ya JetBlue yari iturutse i Curaçao, ikirwa giherereye hafi y’inkombe ya Venezuela, yerekeza ku kibuga cy’indege cya JFK cyo mu mujyi wa New York.
Ingabo zirwanira mu kirere z’Amerika zemeza ko abapilote ba gisirikare batojwe neza kandi bakurikiza amabwiriza agenga imikoreshereze y’ikirere, kandi ko umutekano ari wo uharanirwa nk’uko babitamgarije ikinyamakuru CBS News.
Ibi bibaye nyuma y’uko ikigo gishinzwe ingendo z’indege za gisivile muri Amerika (FAA) iburira indege zo muri Amerika kwitwararika cyane mu kirere cya Venezuela kubera ubwiyongere bw’ibikorwa bya gisirikare n’umutekano utizewe muri ako gace.
