Perezida w’u Burundi akaba n’Umuyobozi w’Umuryango w’Afurika Yunze Ubumwe (AU), Évariste Ndayishimiye, yashimiye Hakainde Hichilema wongeye gutorerwa kuyobora Zambia, amwifuriza gukomeza kugeza igihugu cye ku mahoro, ubumwe n’iterambere.
Mu butumwa yatangaje nyuma y’ishyirwa ahagaragara ry’ibyavuye mu matora, Perezida Ndayishimiye yavuze ko amushimiye mu izina ry’abaturage na Guverinoma y’u Burundi ndetse n’umuryango mugari w’Afurika Yunze Ubumwe.
Yagize ati: “Mwoherereje ibyifuzo byiza byo gukomeza gutsinda mu gihe ayobora abaturage ba Zambia abaganisha ku mahoro arambye, ubumwe n’iterambere, ku nyungu za Zambia n’umugabane wacu muri rusange.”
Komisiyo y’Amatora ya Zambia (ECZ) yatangaje ko Hichilema, usanzwe ayobora ishyaka United Party for National Development (UPND), yatsinze amatora yabaye ku wa 13 Kanama 2026, bimuhesha manda ya kabiri y’imyaka itanu.
Ibyavuye mu turere twose 226 twatorewemo byagaragaje ko Hichilema yabonye amajwi 2,965,326, angana na 60.49% by’amajwi yemewe. Uwo bari bahanganye cyane, Brian Mundubile, yagize amajwi 1,856,217, ni ukuvuga 37.87%. Kuba Hichilema yararengeje 50% byatumye hatabaho icyiciro cya kabiri cy’amatora.
Nyuma yo gutangazwa nk’uwatsinze, Hichilema yashimiye abamutoye, anizeza ko azayobora Abanyazambia bose, barimo n’abashyigikiye abo bari bahanganye. Yavuze ko manda ye ya kabiri izibanda ku gukomeza kuzahura ubukungu, guhanga imirimo no gutuma iterambere rigera ku baturage benshi.
Hichilema w’imyaka 64 yatorewe bwa mbere kuyobora Zambia mu 2021, nyuma yo gutsinda Edgar Lungu wari usanzwe ku butegetsi. Mbere yo kugera ku mwanya w’umukuru w’igihugu, yari yaragerageje kwiyamamariza uwo mwanya inshuro nyinshi, ndetse mu 2017 aza gufungwa ashinjwa ubugambanyi, mbere y’uko arekurwa.
Muri manda ye ya mbere, Guverinoma ye yashyize imbaraga mu kuvugurura imyenda Zambia yari yarabuze ubushobozi bwo kwishyura kuva mu 2020, kongera gukurura abashoramari no guteza imbere ubucukuzi bw’umuringa, umwe mu mutungo kamere ukomeye w’icyo gihugu. Yanashyizeho gahunda zirimo uburezi bwisumbuye butishyurwa no kongera amafaranga agenerwa serivisi z’imibereho myiza.
Icyakora, manda ye ya kabiri itangiye hari ibibazo bikomeye bimutegereje, birimo ubukene, izamuka ry’ibiciro by’ibiribwa n’ibindi bikenerwa buri munsi, ubushomeri mu rubyiruko no gutuma izamuka ry’ubukungu rigera ku baturage basanzwe.
Aya matora kandi yabayemo ibibazo, kuko ibarura ry’amajwi ryigeze guhagarikwa by’agateganyo nyuma y’ibitero ku bakozi b’amatora no kwibwa kw’impapuro z’itora. Abatavuga rumwe n’ubutegetsi banenze uburyo ibikorwa byo kwiyamamaza byagenze, mu gihe Guverinoma yahakanye ibirego byo kubabuza kwisanzura.
Ubutumwa bwa Ndayishimiye bushimangira icyizere abayobozi b’Afurika bafitiye Hichilema, ariko intsinzi ye izanapimirwa ku bushobozi bwo guhindura iterambere rivugwa mu mibare ubuzima bwiza bugaragara mu ngo z’Abanyazambia.
Ibitekerezo