Umuntu umwe yapfuye, abandi benshi barakomereka nyuma y’iturika rikomeye ryabereye ku cyambu cya Rotterdam mu Buholandi, kuri uyu wa Kane, tariki ya 13 Kanama 2026.
Polisi ya Rotterdam yatangaje ko iryo turika ryabereye mu gace ka Europoort, ku muhanda wa Moezelweg, ahagana saa 11:34 z’amanywa. Abakomeretse bahise bajyanwa kwa muganga, ariko umubare wabo n’uko ubuzima bwabo buhagaze ntibiratangazwa.
Inzego z’ubutabazi zahise zohereza aho byabereye imodoka zitwara indembe esheshatu, kajugujugu y’ubutabazi n’abashinzwe kuzimya inkongi. Amakuru y’ibanze avuga ko iturika ryabaye mu gihe hakorwaga imirimo ifitanye isano n’imiyoboro, ariko abayobozi ntibarabyemeza nk’intandaro ya ryo.
Polisi ya Rotterdam yatangiye iperereza rigamije kumenya icyateye iryo turika. Agace ryabereyemo kahise gafungwa kugira ngo abashinzwe iperereza babashe gukusanya ibimenyetso.
Moezelweg isanzwe irimo imiyoboro myinshi inyuramo ibikoresho bitandukanye. Mu 2025, Ubuyobozi bw’Icyambu cya Rotterdam bwari bwatangaje ko bwaguye agace iyo miyoboro inyuramo kugira ngo haboneke umwanya wo kongeramo imiyoboro mishya, irimo n’utwara umwuka wa karuboni (CO₂).
Icyambu cya Rotterdam ni kimwe mu byambu bikomeye cyane mu Burayi, kikaba gifite ibikorwa byo kwakira no kohereza ibicuruzwa birimo peteroli, gaz, ibinyabutabire n’imizigo itwarwa mu bikoresho binini. Kugeza ubu, ntiharatangazwa niba iryo turika ryahungabanyije imikorere rusange y’icyambu.
Ibitekerezo