Munyakazi Sadate wahoze ayobora Rayon Sports na Dr Gamariel Mbonimana wahoze ari Umudepite mu Nteko Ishinga Amategeko y’u Rwanda, bateranye amagambo ku mbuga nkoranyambaga bapfa ikibazo cy’imyambarire kimaze iminsi kivugisha benshi.
Impaka zatangiye ubwo Sadate yandikiraga Polisi y’u Rwanda kuri X, ayisaba gukomeza gahunda yise iyo “kudohoka” mu kurwanya imyambarire afata nk’idakwiriye mu ruhame.
Sadate yavuze ko aho gukomeza gukururana n’abambaye imyenda ifatwa nk’ikabije, Polisi yakorana n’abatanga serivisi zirimo utubari, ahabera ibitaramo, abamotari, abatwara imodoka zitwara abagenzi ndetse n’ibigo byigenga bicunga umutekano.
Yasabye ko abo bose bahabwa amabwiriza yo kutakira abantu bambaye mu buryo afata nk’ubudakwiriye. Yongeyeho ko abarenze kuri ayo mabwiriza bajya bacibwa ihazabu, naho umurinzi wemereye umuntu nk’uwo kwinjira akamburwa uburenganzira bwo gukora ako kazi.
Sadate yanatanze igitekerezo cy’uko abapolisi bambaye imyenda isanzwe bajya boherezwa mu tubari, mu bitaramo n’ahandi hahurira abantu benshi, kugira ngo batange amakuru ku bafite imyambarire cyangwa imyitwarire ikabije.
Yabwiye urubyiruko ko ari rwo ruzaragwa igihugu, bityo ko rukwiye kwirinda imyitwarire abona ko inyuranyije n’indangagaciro z’Abanyarwanda.
Dr Gamariel Mbonimana ntiyemeranyije n’ibi bitekerezo. Mu butumwa yamusubije, yamusabye gukoresha ubwonko no guhagarika icyo yise “ibitekerezo bidafite ishingiro”, avuga ko ari gukomeza kongera ubukana bw’impaka kandi Polisi yaramaze gusaba imbabazi no gutanga umurongo ku byabaye.
Mbonimana yavuze ko azakomeza kurwanya ibitekerezo byo kugenzura imyambarire mu gihe Polisi itahinduye itangazo rya yo. Yasabye kandi ko abakobwa n’abagore baba barafashwe bazira imyambarire, cyane cyane abo mu ntara, barekurwa. Icyakora, nta mibare cyangwa itangazo ryemewe rigaragaza umubare w’abo avuga ko bafashwe.
Yavuze kandi ko umukobwa wagaragaye mu mashusho yasangijwe na Sadate yari yambaye bisanzwe, anenga uburyo amagambo Perezida Paul Kagame yavuze ku myambarire yakoreshejwe muri izo mpaka.
Perezida Kagame yavuze ku myambarire y’urubyiruko ku wa 19 Mutarama 2025, mu masengesho yo gusabira igihugu. Icyo gihe yanenze amashusho y’urubyiruko rwagaragaraga rwambaye ubusa cyangwa rwishora mu bikorwa by’urukozasoni, cyane cyane ku mbuga nkoranyambaga.
Sadate yasubije Mbonimana mu magambo arimo kunenga amateka ye, ariko avuga ko atifuza gukomeza guterana amagambo na we. Yasoje amwita “urugero rwiza rw’ibihinduka” kandi amwifuriza umunsi mwiza.
Izi mpaka zije nyuma y’amashusho yafatiwe ahategerwa imodoka mu Karere ka Rubavu, agaragaza abapolisi babiri bafata umukobwa bivugwa ko bamuhoraga imyambarire.
Polisi y’u Rwanda yatangaje ko abo bapolisi bafunzwe, umukobwa ararekurwa, ndetse abapolisi bose bahabwa amabwiriza yo kwirinda ko uburyo nk’ubwo bwo gufata abantu bwongera kubaho.
Ikibazo cy’imyambarire cyari cyanavuzwe cyane nyuma y’uko hari abakobwa bangiwe kwinjira mu gitaramo cya Diamond Platnumz cyabereye muri parikingi ya BK Arena, bitewe n’imyambaro abashinzwe umutekano bavugaga ko idakwiriye.
Nubwo amategeko y’u Rwanda ahana ibikorwa by’urukozasoni bikorewe mu ruhame, impaka zikomeje kwibanda ku kuba nta bipimo by’imyambarire bisobanutse bihari, ndetse no ku buryo kurengera umuco byakorwa hatabangamiwe agaciro n’uburenganzira bya muntu.
Ibitekerezo