Umunyamakuru, umushyushyarugamba akaba n’icyamamare ku mbuga nkoranyambaga muri Uganda, Sheilah Gashumba, yatangaje ko nubwo yifuza gushyingirwa no kugira umuryango, igitekerezo cyo gutwita no kubyara kimutera ubwoba bukomeye.
Sheilah yavuze ko adatinya gusa ububabare bushobora kujyana no kubyara, ahubwo anahangayikishwa n’impinduka kuba umubyeyi byazana mu buzima bwe bwa buri munsi, cyane cyane mu kazi.
Uyu mukobwa w’imyaka 30 amaze igihe kirekire akora mu itangazamakuru no mu myidagaduro. Yatangiye kugaragara kuri televiziyo akiri umwana, ku buryo avuga ko gukora ari bwo buzima yamenyereye kuva afite imyaka umunani nk’uko ibitangazamakuru byo muri Uganda byatangaje.
Yagize ati: “Ntekereza cyane ko kubyara bishobora kuba bitandeba. Mfite ubwoba bwinshi cyane bw’ibijyanye na byo byose, kandi sinshobora kwiyumvisha nicaye mu rugo ntari gukora. Natangiye gukora mfite imyaka umunani, ni bwo buzima namenyereye.”
Sheilah yongeyeho ko kugeza ubu atarabasha kwiyumvisha uko yaba ameze ari umubyeyi ugomba kumara igihe kinini mu rugo yita ku mwana. Icyakora, ntiyafunze burundu amarembo yo kubyara, kuko yemera ko uko abyumva ubu bishobora kuzahinduka.
Ati: “Mu by’ukuri sinshobora kwiyumvisha ndi muri icyo cyiciro cy’ubuzima, ariko wenda umunsi umwe nzahita numva naracyiteguye. Birashoboka.”
Aya magambo yakurikiye ibyo yari aherutse kuvuga ku cyifuzo cyo gushyingirwa no kubaka umuryango n’umukunzi we Alex Bidandi. Muri Kanama 2026, Sheilah yavuze ko umubano we na Alex watumye ahindura uko yabonaga gushyingirwa, amushimira kuba umuntu ukora cyane kandi utekereza ku hazaza. Yanavuze ko se, Frank Gashumba, yamaze kumwakira mu muryango.
Nubwo yatangiye kubona gushyingirwa mu buryo bushya, Sheilah agaragaza ko gutwita no kubyara bikiri intambwe yumva ataritegura gutera.
Ubuhamya bwe bwakuruye ibiganiro ku mbuga nkoranyambaga, aho bamwe mu bamukurikira bavuze ko na bo baterwa ubwoba no kubyara no guhindura imibereho bari basanzwe bamenyereye.
Gusa ubwoba bwo gutwita cyangwa kubyara si ikibazo cyihariye kuri Sheilah. Hari abagore benshi bahura na bwo, ku rugero rutandukanye. Iyo bukabije, inzobere mu buzima zibugira inama yo kuganira n’abaganga cyangwa abajyanama kugira ngo bahabwe amakuru yizewe n’ubufasha bukenewe.
Sheilah, uzwi cyane mu myidagaduro yo muri Uganda, yakoze kuri televiziyo no kuri radiyo, anayobora ibikorwa bye bwite. Amagambo ye agaragaza ko nubwo yifuza kuzagira urugo, atarahitamo niba kubyara bizaba kimwe mu bigize uwo mushinga w’ubuzima.
Ibitekerezo