Mbabazi Shadia wamamaye ku mbuga nkoranyambaga nka Shaddyboo, yatashye nyuma y’igihe yari amaze mu Kigo cya Isange Rehabilitation Centre giherereye mu Karere ka Huye, aho yari yaragiye guhabwa ubufasha bwo kureka gukoresha ibiyobyabwenge.
Aya makuru aje mu gihe Yugi Umukaraza, wari umaze igihe afunzwe nyuma yo gukurikiranwaho icyaha cyo gukoresha Shaddyboo imibonano mpuzabitsina ku gahato, na we yarekuwe kuri uyu wa Kane tariki ya 3 Nzeri 2026, nyuma y’uko icyo cyaha atagihamijwe.
Amakuru yatanzwe mbere n’Urwego rw’Igihugu rw’Ubugenzacyaha (RIB) agaragaza ko Shaddyboo yajyanywe muri Isange Rehabilitation Centre ku wa 6 Nyakanga 2026, ku bushake bwe, nyuma y’ibyavuye mu iperereza ryari ryatangiye ku kirego yari yatanze.
Icyo gihe Umuvugizi wa RIB, Dr. Murangira B. Thierry, yari yasobanuye ko Shaddyboo atari afunzwe, ahubwo yari yoherejwe muri iki kigo kugira ngo afashwe kureka gukoresha ibiyobyabwenge, ahabwe ubufasha mu by’imitekerereze ndetse hanashakwe kumenya impamvu zaba zaratumye abikoresha.
Kujyanwa muri iki kigo byari byakurikiye iperereza ryatangiye nyuma y’uko Shaddyboo areze Yugi Umukaraza, amushinja kumukoresha imibonano mpuzabitsina ku gahato. Yugi yatawe muri yombi ku wa 23 Kamena 2026, dosiye ye iza gushyikirizwa Ubushinjacyaha.
Nyuma y’amezi agera kuri abiri Shaddyboo ari muri Isange Rehabilitation Centre, amakuru yo kuri uyu wa 3 Nzeri 2026 avuga ko yamaze gutaha.
Ku rundi ruhande, Yugi Umukaraza na we yarekuwe, nyuma y’uko icyaha cyo gukoresha Shaddyboo imibonano mpuzabitsina ku gahato yari yarakurikiranyweho atagihamijwe. Amakuru yatanzwe avuga ko kurekurwa kwe kwabaye nyuma y’ubwumvikane yagiranye n’Ubushinjacyaha ku byari bisigaye muri dosiye ye.
Ibi bibaye nyuma y’amezi arenga abiri iki kibazo gikurikiranywe cyane mu myidagaduro nyarwanda, kuva Shaddyboo yatanga ikirego, Yugi agafungwa ndetse na Shaddyboo akaza kujya mu kigo kimufasha kureka ibiyobyabwenge.
Kuri uyu wa Kane tariki ya 3 Nzeri 2026, bombi batangiye ikindi cyiciro cy’ubuzima bwa bo, Shaddyboo avuye mu kigo cy’ubugororangingo n’ubuvuzi yari amazemo hafi amezi abiri, mu gihe Yugi we yongeye kubona umudendezo nyuma y’igihe yari amaze afunzwe.
Ibitekerezo