Abaturage ba Uganda n’abandi bifuza kwihera ijisho ibyiza nyaburanga by’iki gihugu bagiye guhabwa amahirwe yo kwinjira ku buntu muri zimwe muri Pariki z’Igihugu n’ahantu habungabungwa inyamaswa, mu gihe cy’iminsi itatu.
Iyi gahunda yiswe Open Park Days 2026 izatangira ku wa 25 kugeza ku wa 27 Nzeri 2026, mu rwego rwo kwizihiza Umunsi Mpuzamahanga w’Ubukerarugendo (World Tourism Day) uba ku wa 27 Nzeri buri mwaka.
Igamije gushishikariza cyane cyane abaturage ba Uganda gusura ibyiza nyaburanga by’igihugu cya bo, kurushaho kumenya akamaro ko kubungabunga urusobe rw’ibinyabuzima no guteza imbere ubukerarugendo bw’imbere mu gihugu.
Mu zashyizwe muri iyi gahunda harimo Murchison Falls National Park, izwi cyane ku masumo ya Murchison aho amazi y’Uruzi rwa Nile anyura hagati y’urutare rufunganye mbere yo gukomeza urugendo.
Hari kandi Queen Elizabeth National Park, imwe muri pariki zizwi cyane muri Uganda, ibamo inyamaswa zitandukanye zirimo intare, inzovu n’imvubu. Iyi pariki izwi by’umwihariko ku ntare zo mu gace ka Ishasha zikunze kugaragara zurira ibiti.
Lake Mburo National Park na Kidepo Valley National Park na zo zizaba ziri muri iyi gahunda.
Uretse Pariki z’Igihugu, ahantu habungabungwa inyamaswa hazafungurwa harimo Pian Upe, Toro-Semliki, Katonga na Ajai Wildlife Reserves.
Kwinjira ni ubuntu, ibindi bishobora kwishyurwa
Nubwo iyi gahunda yiswe iy’ubuntu, abifuza kuyitabira basabwa kumenya ko amafaranga akurwaho ari asanzwe yishyurwa ku muryango wa pariki kugira ngo umuntu yinjiremo.
Ibindi byangombwa by’urugendo birimo ubwikorezi, amafunguro, aho kurara ndetse na bimwe mu bikorwa byihariye bikorerwa muri pariki bishobora gukomeza kwishyurwa.
Abateganya gusura izi pariki basabwa rero kubanza kumenya serivisi zizaba zitangwa ku buntu n’izizakomeza kwishyurwa.
UWA ishaka ko abaturage bamenya ibyiza by’igihugu cyabo
Uganda izwi ku rwego mpuzamahanga nk’igihugu gikungahaye ku bukerarugendo bushingiye ku nyamaswa n’ibidukikije, aho ba mukerarugendo bajya kureba ingagi zo mu misozi, intare, inzovu, imvubu n’izindi nyamaswa.
Icyakora, hari abaturage b’iki gihugu bataragira amahirwe yo gusura Pariki z’Igihugu. Uganda Wildlife Authority (UWA) ishaka ko iyi gahunda iba imwe mu nzira zo guhindura iyo myumvire no kongera umubare w’abaturage basura ibyiza nyaburanga by’igihugu cyabo.
Dorcus Rukundo, ushinzwe by’agateganyo ubukerarugendo n’iterambere ry’ubucuruzi muri UWA, yavuze ko kugira ngo abaturage bashobore kumenyekanisha ibyiza by’igihugu cyabo, na bo bakwiye kubanza kubibona no kubisobanukirwa.
Pariki z’ingagi ntizirimo
Ntabwo ariko Pariki z’Igihugu zose za Uganda zizafungurwa ku buntu muri iyi minsi itatu.
Bwindi Impenetrable National Park, izwi cyane ku ngagi zo mu misozi, na Mgahinga Gorilla National Park ntizashyizwe muri iyi gahunda. Kibale National Park, izwi cyane ku nguge zo mu bwoko bwa chimpanzee, na yo ntirimo.
Aha hantu hagira amabwiriza yihariye agena umubare w’abahasura n’uburyo ibikorwa byo gusura inyamaswa bikorwa, mu rwego rwo kuzirinda no kubungabunga ibidukikije.
Ibirori nyamukuru bizabera i Mbale
Gahunda ya Open Park Days izasozwa ku wa 27 Nzeri 2026, umunsi isi izaba yizihiza World Tourism Day.
Muri Uganda, ibirori nyamukuru biteganyijwe kubera mu Mujyi wa Mbale, mu Burasirazuba bw’igihugu. Biteganyijwe ko bizanifashishwa mu kumenyekanisha ibyiza nyaburanga byo muri ako gace birimo Mount Elgon na Sipi Falls, umuco w’abaturage baho ndetse n’ubukerarugendo bushingiye ku ikawa.
Ni gahunda igaragaza ko Uganda ishaka guteza imbere ubukerarugendo bw’imbere mu gihugu, ari na ko yereka abaturage ko ibyiza nyaburanga bikurura abanyamahanga buri mwaka na bo bashobora kubisura no kugira uruhare mu kubibungabunga.
Abifuza gukoresha aya mahirwe yo ku wa 25–27 Nzeri 2026 basabwa kubanza kugenzura amabwiriza agezweho, cyane cyane ku bijyanye na pariki bifuza gusura, serivisi zizaba ari ubuntu n’izizakomeza kwishyurwa.
Ibitekerezo