Masisi: Ivu ryabuze agatebo mu mirwano ikaze nyuma y’ibitero bya ‘drones’ ku bayobozi bakuru ba M23
Imirwano ikaze yadutse ku wa Kabiri w’ejo hashize tariki ya 24 Gashyantare 2026, yakomeje no mugitondo cyo kuri uyu wa Gatatu mu bice bya ‘groupement’ ya Nyamaboko I no muri ‘chefferie’ ya Osso Banyungu, biherereye muri Teritwari ya Masisi mu Ntara ya Kivu ya Ruguru.
Amakuru atangwa n’abahagarariye sosiyete sivile agaragaza ko iyi mirwano yateye impagarara, igatuma abasivile benshi bahunga bakava mu bya bo nk’uko BBC yabitangaje.
Mugitondo cyo kuri uyu wa Gatatu, imirwano yumvikanye mu duce twa Ndete na Kazinga, nyuma y’indi yabaye ku mugoroba no mu ijoro ryo ku wa Kabiri mu gace ka Mahanga, nk’uko byemezwa na Sadiki Voltaire uyobora sosiyete sivile ya Masisi.
Ibi bibaye nyuma y’uko indege zitagira abapilote (drones) z’ingabo za FARDC zigabye igitero cyahitanye Lit. Col Willy Ngoma wari umuvugizi wa gisirikare wa AFC/M23, bikavugwa ko hari n’abandi bakomeretse bari kumwe na we.
Bimwe mu bitangazamakuru byo muri Repubulika Iharanira Demokarasi ya Congo bitangaza ko abarwanyi ba Wazalendo bafatanyije na FARDC bigaruriye ibice byabereyemo imirwano ku wa Kabiri no kuri uyu wa Gatatu, babikuyemo abarwanyi ba M23.
Sadiki Voltaire yatangarije BBC ko ibitero biri kuba bikomeye kandi ko amakuru bafite yerekana ko abaturage benshi bamaze guta ingo za bo bahunga umutekano muke.
Icyakora, Sadiki yavuze ko atashimangira amakuru avuga ko Wazalendo na FARDC birukanye M23 mu duce tw’icyaro twa Mahanga n’ahandi, kuko ari ibyo yumvise atarabona gihamya ya byo.
Kugeza ubu, yaba FARDC cyangwa M23 nta ruhande ruratangaza ku mugaragaro iby’iyi mirwano yo ku wa Kabiri n’iyo kuri uyu wa Gatatu. Mu cyumweru gishize ariko, impande zombi zakomeje gushinjanya kutubahiriza amasezerano y’agahenge zari zaragiranye.
