Uko imirwano yatumye abakinnyi 23 bahabwa amakarita atukura (Video)
Amakarita atukura yahawe abakinnyi 23 nyuma y’uko havutse imirwano rusange hagati y’amakipe yo muri Brazil, Cruzeiro na Atlético Mineiro, mu mukino wa nyuma wa shampiyona ya leta ya Campeonato Mineiro.
Uwo mukino wabereye i Belo Horizonte, aho Kaio Jorge yatsinze igitego rukumbi cyahesheje intsinzi ikipe ya Cruzeiro, iyobowe n’uwahoze atoza ikipe y’igihugu ya Brazil, Tite. Cruzeiro yatsinze Atlético Mineiro igitego 1-0, yegukana igikombe cya Minas Gerais ku nshuro ya mbere kuva mu 2019.
Icyakora, uwo mukino waranzwe n’imvururu zikomeye zabaye mu masegonda ya nyuma, bituma abashinzwe umutekano n’abapolisi ba gisirikare bamanuka mu kibuga kugira ngo batandukanye abakinnyi. Nyuma ya ho, hafashwe icyemezo cyo guha amakarita atukura abakinnyi 23, barimo n’uwahoze ari rutahizamu w’ikipe y’igihugu ya Brazil Hulk ukinira Atlético Mineiro.
Imirwano yatangiye ubwo umunyezamu wa Atlético Everson yasunikiraga hasi umukinnyi wa Cruzeiro, Christian, akanamushinga ivi ku gituza. Christian yari amaze kugongana na Everson mu gihe yirukankaga ku mupira.
Abakinnyi ba Cruzeiro bahise baza kurengera mugenzi wa bo, basunika Everson bamugeza ku giti cy’izamu, bituma n’abandi bakinnyi b’amakipe yombi binjira muri iyo mirwano mu gihe abashinzwe umutekano bageragezaga kubatandukanya.
Nubwo umusifuzi Matheus Delgado Candancan nta mukinnyi yerekanye ikarita itukura mu gihe umukino wari ukomeje, ibitangazamakuru byo muri Brazil birimo Globo byatangaje ko nyuma y’umukino abakinnyi 23 birukanwe kubera ko imirwano yabujije umusifuzi kubaha amakarita mu kibuga.
Mu bakinnyi birukanwe harimo 12 ba Cruzeiro barimo na Kaio Jorge watsinze igitego cy’intsinzi. Ku ruhande rw’Atlético Mineiro, abakinnyi 11 barimo Renan Lodi, wahoze akinira Atlético Madrid na Nottingham Forest, ndetse na Hulk.
Agahigo k’abakinnyi benshi bahawe amakarita atukura mu mukino umwe kabaye mu 2011 mu mukino wahuje Atlético Claypole na Victoriano Arenas mu cyiciro cya gatanu cya shampiyona y’Argentina, aho abakinnyi 36 bose bari mu mukino birukanwe kubera imirwano rusange.
Nyuma y’umukino wabaye ku Cyumweru, Hulk yavuze ko ibyabaye bibabaje. Yagize ati:
“Birababaje cyane. Ntidukwiye gutanga urugero nk’urwo kuko bigira ingaruka ku rwego mpuzamahanga. Dufite inshingano zo kurinda isura yacu n’iy’ikipe”.
Muri iyi shampiyona ya Campeonato Brasileiro Série A, amakipe yombi Atlético Mineiro na Cruzeiro ntaratsinda umukino n’umwe mu mikino ine amaze gukina, aho Cruzeiro iri ku mwanya wa 17 naho Atlético ikaba iri ku wa 19 ku rutonde.
