U Rwanda mu bihugu 10 byo munsi y’Ubutayu bwa Sahara bitumiza intwaro nyinshi
Ikigo Mpuzamahanga gikora ubushakashatsi ku mahoro cyitwa Stockholm International Peace Research Institute kigaragaza ko ibihugu byo munsi y’Ubutayu bwa Sahara bikomeje kongera ubushobozi mu bya gisirikare binyuze mu kugura ibikoresho by’intambara bigezweho.
Raporo y’iki kigo igaragaza ko iyinjizwa ry’intwaro muri Afurika ryagabanutseho 41%, ishingiye ku mibare yo hagati ya 2021 na 2025.
Iyi Raporo yashyize u Rwanda mu bihugu 10 bya mbere byo munsi y’Ubutayu bwa Sahara byatumije intwaro nyinshi, aho ruza ku mwanya wa 10.
Igaragaza ko u Rwanda rwihariye 3,5% by’intwaro zose zinjizwa muri Afurika yo munsi y’Ubutayu bwa Sahara muri icyo gihe, aho agaciro kazo kageraga kuri miliyoni 118,73 z’ibipimo bya TIV (Trend Indicator Values).
Iyo raporo ivuga ko u Rwanda rwakomeje kongera ubushobozi bwo kurinda ikirere cyarwo ndetse no kongerera imbaraga ingabo zarwo, binyuze mu kugura kajugujugu z’intambara, kajugujugu nto, imodoka z’intambara zitwara abasirikare zikingiye, misile zirasa indege ziri hafi hamwe n’uburyo bwo gutwara misile zirasa indege ziri ku butaka.
SIPRI ivuga kandi ko u Rwanda rwaguze ibyo bikoresho bya gisirikare mu bihugu birimo Türkiye, u Bushinwa, u Burusiya, Qatar ndetse na Leta Zunze Ubumwe za Amerika, mbere y’uko icyo gihugu gifatira ibihano u Rwanda birimo no guhagarika ubufatanye mu by’intwaro.
Nigeria ni cyo gihugu cya mbere cyatumije intwaro nyinshi muri ibi bihugu, ikurikiwe na Sénégal , Mali, Ethiopia, Angola, Kenya, Mauritania, Burkina Faso na Côte d’Ivoire.
Ku rwego rw’abacuruza intwaro muri Afurika, Leta Zunze Ubumwe za Amerika niyo iziza ku isonga ifite 19%, Ubushinwa bufite 17%, Uburusiya bufite 15% naho Ubufaransa bufite 8,3%.
