Sénégal yatambagije igikombe cya CAN nubwo yacyambuwe – ni iki kiri inyuma y’aya makimbirane?
Ikipe y’igihugu ya Sénégal y’umupira w’amaguru yakoze igikorwa cyo kugaragaza igikombe cya CAN imbere y’abafana mbere y’umukino wa gicuti wayihuje na Peru ku wa Gatandatu, wabereye i Paris kuri Stade de France. Ibi byabaye nubwo muri uku kwezi hari hafashwe icyemezo cyo kuyambura icyo gikombe.
Byatangajwe ko Maroc ari yo yegukanye CAN 2025, nyuma y’aho Confederation of African Football (CAF) isheshe ibyari byatangajwe ku mukino wa nyuma wabaye muri Mutarama uyu mwaka.
Muri uwo mukino wa nyuma, abakinnyi ba Sénégal basohotse mu kibuga bigaragambya, nyuma y’uko Maroc yari yahawe penaliti mu minota y’inyongera, mu gihe amakipe yombi yanganyaga 0-0. Nyuma y’iminota igera kuri 17, umukino wongeye gukinwa, Maroc ntiyinjiza iyo penaliti, hanyuma Sénégal iza gutsinda igitego cyayihesheje intsinzi mu minota y’inyongera.
Icyakora, nyuma y’uko Fédération Royale Marocaine de Football itanze ubujurire, CAF yaje gufata icyemezo cyo guha Maroc intsinzi y’ibitego 3-0, ivuga ko Sénégal yatsinzwe uwo mukino. Sénégal yahise ijuririra iki cyemezo mu rukiko mpuzamahanga nkemurampaka mu mikino, Court of Arbitration for Sport (CAS), rwatangaje ko ruzabifataho umwanzuro vuba bishoboka.
Mbere y’umukino wa Peru, kapiteni wa Sénégal Kalidou Koulibaly afatanyije na bagenzi be, binjiye mu kibuga batwaye igikombe cya CAN mu rwego rwo kukigaragaza mu cyubahiro, aho we hamwe n’umunyezamu Édouard Mendy bagishyize ahari hateganyijwe abashyitsi b’icyubahiro.
Sénégal kandi yakinnye uwo mukino yambaye imyenda iriho inyenyeri ebyiri hejuru y’ikirango, igaragaza ko yibara nk’iyamaze gutwara CAN ebyiri: iyo mu 2021 n’iyo mu 2025 nubwo itavugwaho rumwe.
Muri uwo mukino wa gicuti, Sénégal yatsinze Peru ibitego 2-0, byinjijwe na Nicolas Jackson na Ismaïla Sarr.
Uyu mukino wabereye i Paris ni wo wa mbere Sénégal ikinnye kuva ku mukino wa nyuma wa CAN, kandi wari mu rwego rwo kwitegura igikombe cy’isi kizatangira muri Kamena uyu mwaka. Sénégal iri mu itsinda rimwe n’Ubufaransa, Norvège ndetse na Bolivia cyangwa Iraq.
